ಕಾಗಕ್ಕ ಗುಬ್ಬಕ್ಕನ ಕತೆ ಹೆಣೆಯುವ ಗುಪ್ತಚರರು

Posted: June 24, 2014 in Uncategorized

ಗುಪ್ತಚರ ಸಂಸ್ಥೆಯನ್ನು (ಐಬಿ) ನಾವು ಗಂಭೀರವಾಗಿ ಪರಿಗಣಿಸಿದ್ದ ಕೊನೇ ಸಂದರ್ಭ ಯಾವುದು? ಇದರ ವರದಿಗಳು ಗಲ್ಲಿ ಗಾಸಿಪ್ ರೀತಿ ಅತಿ ಉತ್ಪ್ರೇಕ್ಷಿತವಾಗಿರುವುದರಿಂದ ಐಬಿ ಬಗ್ಗೆ ಎಚ್ಚರವಾಗಿರುವಂತೆ ಪ್ರತಿಯೊಬ್ಬ ಪರ್ತಕರ್ತನಿಗೂ ಮೊದಲೇ
ತಿಳಿಸಲಾಗಿರುತ್ತದೆ. ಐಬಿ ವರದಿಗಳು ಕಟ್ಟುಕತೆ ಮತ್ತು ತಪ್ಪು ಮಾಹಿತಿಗಳನ್ನೂ ಒಳಗೊಂಡಿರುತ್ತವೆ. ಅಲ್ಲದೆ, ಅಂಕಿತ ಬಿದ್ದಿಲ್ಲದ ಇದರ ವರದಿಗಳ ಬೆನ್ನಿಗೆ ಸಂಸ್ಥೆ ನಿಲ್ಲುವುದಿಲ್ಲ. ಹೀಗಾಗಿ, ವರದಿಗಾರ ಅಥವಾ ಪತ್ರಕರ್ತರಾಗಿ ನೀವು ಐಬಿ ನೀಡಿರುವ ಮಾಹಿತಿಗಳನ್ನು ಬಳಸಿದರೆ ಅದು ಅಪಾಯ ಮೈಮೇಲೆ ಎಳೆದುಕೊಂಡಂತೆಯೇ ಸರಿ.

ಗ್ರೀನ್‌ಪೀಸ್ ಥರದ ಸ್ವಯಂಸೇವಾ ಸಂಸ್ಥೆಗಳು ಅರ್ಥವ್ಯವಸ್ಥೆಯನ್ನು ಹಳಿ ತಪ್ಪಿಸುವ ಮೂಲಕ ದೇಶಕ್ಕೆ ಗಂಡಾಂತರ ತಂದೊಡ್ಡಿವೆ ಎಂಬ 21 ಪುಟಗಳ ಗುಪ್ತಚರ ವರದಿ ಬಗ್ಗೆ ಕಳೆದ ಎರಡು ವಾರಗಳ ಹಿಂದೆ ಮಾಧ್ಯಮದಲ್ಲಿ ನಿರಂತರ ಚರ್ಚೆ ನಡೆದಿತ್ತು. ಇಂಥ ಎನ್‌ಜಿಒಗಳಿಂದ ದೇಶದ ಜಿಡಿಪಿಯ ಶೇ.2ರಿಂದ 3ರಷ್ಟು ಹಾನಿ ಸಂಭವಿಸಿದೆ ಎಂದು ಲೆಕ್ಕ ಹಾಕಲಾಗಿತ್ತು. ಅಂದರೆ, ದೇಶದ ಬೊಕ್ಕಸಕ್ಕೆ ಸರಿಸುಮಾರು 2.5 ಲಕ್ಷ ಕೋಟಿ ರೂ.ಗಳನ್ನು ಗ್ರೀನ್‌ಪೀಸ್ ರೀತಿಯ ಸ್ವಯಂ ಸೇವಾ ಸಂಸ್ಥೆಗಳು ತಪ್ಪಿಸಿದ್ದವು! ಭಾರತೀಯ ಅರ್ಥ ವ್ಯವಸ್ಥೆಯನ್ನು ಹಳಿ ತಪ್ಪಿಸಲು ಹವಣಿಸುತ್ತಿರುವ ವಿದೇಶಿ ಪಟ್ಟಭದ್ರ ಹಿತಾಸಕ್ತಿಗಳ ಪರವಾಗಿ ಇಂಥ ಶಂಕಿತ ಸಂಘಟನೆಗಳು ಕಾರ್ಯನಿರ್ವಹಿಸುತ್ತಿದ್ದವು. ಈ ಕೆಲಸಕ್ಕಾಗಿ ಇವು ವಿದೇಶಿ ಮೂಲಗಳಿಂದ 50 ಕೋಟಿ ರೂ. ಪಡೆದಿದ್ದವು ಎಂದು ಐಬಿ ವರದಿ ಒಪ್ಪಿಸಿತ್ತು. ಅಂತೂ, ಈ ಎನ್‌ಜಿಒಗಳು ಅತ್ಯಂತ ಕನಿಷ್ಠ ವಿದೇಶಿ ಅನುದಾನ ಬಳಸಿ ಅಜಮಾಸು 2.5 ಲಕ್ಷ ಕೋಟಿ ನಷ್ಟವನ್ನು ಉಂಟುಮಾಡಿದ್ದವು!

ಸರಕಾರ ಯಾರನ್ನಾದರೂ ಗುರಿ ಮಾಡಿಕೊಂಡು ಹಣಿಯಲು ಇಚ್ಛಿಸಿದರೆ ಆಗ ಮಾತ್ರ ಗುಪ್ತಚರ ವರದಿಯನ್ನು ಗಂಭೀರವಾಗಿ ಪರಿಗಣಿಸುತ್ತದೆ ಎಂದು ಗುಪ್ತಚರ ಸಂಸ್ಥೆ ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ಬಲ್ಲವರು ಹೇಳುತ್ತಾರೆ. ಈ ಬಾರಿ ಅದರ ಗುರಿ ಸ್ವಯಂ ಸೇವಾ ಸಂಸ್ಥೆಗಳು.

ಗುಪ್ತಚರ ವಿಭಾಗ ದುರ್ಬಳಕೆಯಾದ ನಿದರ್ಶನಗಳೂ ಕಣ್ಮುಂದಿವೆ. 90 ದಶಕದಲ್ಲಿ ಈ ವಿಭಾಗವು, ಭಾರತೀಯ ಬಾಹ್ಯಾಕಾಶ ಸಂಸ್ಥೆ ಯ (ಇಸ್ರೊ) ಇಬ್ಬರು ಹಿರಿಯ ವಿಜ್ಞಾನಿಗಳಾದ ಡಿ ಶಶಿಕುಮಾರನ್ ಮತ್ತು ಎಸ್ ನಂಬಿ ನಾರಾಯಣ್ ಅವರನ್ನು ಗೂಢಚೆರ್ಯೆ ಪ್ರಕರಣವೊಂದಕ್ಕೆ ಸಿಲುಕಿಸಿ ಸೋಜಿಗ ಎನ್ನುವಂಥ ಕತೆ ಕಟ್ಟಿತ್ತು. ಈ ಕತೆ ಯಾವುದೇ ಬಾಲಿವುಡ್ ಚಿತ್ರಕತೆಗಳಿಗೂ ಕಡಿಮೆ ಇರಲಿಲ್ಲ. ಮಾಧ್ಯಮಗಳಲ್ಲಿ ಈ ಬಗ್ಗೆ ಅಲ್ಲೋಲ ಕಲ್ಲೋಲ ಎದ್ದಿದ್ದ ನಡುವೆಯೇ ಈ ಇಬ್ಬರೂ ವಿಜ್ಞಾನಿಗಳನ್ನು 1994ರಲ್ಲಿ ಬಂಧಿಸಲಾಯಿತು. ಎರಡು ವರ್ಷಗಳ ತರುವಾಯ ಈ ವಿಜ್ಞಾನಿಗಳ ಮೇಲಿದ್ದ ಪ್ರಕರಣವನ್ನು ಸುಪ್ರೀಂ ಕೋರ್ಟ್ ವಜಾಗೊಳಿಸಿತು.

ವಿಜ್ಞಾನಿಗಳನ್ನು ದೋಷಮುಕ್ತರನ್ನಾಗಿಸುವ ವೇಳೆ ಗುಪ್ತಚರ ಸಂಸ್ಥೆ ಮತ್ತು ಆ ಸಂಸ್ಥೆಯು ಶಶಿಕುಮಾರನ್, ನಂಬಿ ನಾರಾಯಣ್ ವಿರುದ್ಧ ಹೆಣೆದಿದ್ದ ಗೂಢಚೆರ್ಯೆ ಖಟ್ಲೆ ವಿರುದ್ಧ ವರಿಷ್ಠ ನ್ಯಾಯಪೀಠ ಚಾಟಿ ಬೀಸಿತ್ತು. ನಿಷ್ಕರ್ಷೆಗೊಳ್ಳದ ಸುಳ್ಳು ವರದಿಗಳನ್ನು ಪ್ರಧಾನಿ ಮತ್ತು ಗೃಹ ಸಚಿವರಿಗೆ ಕಳುಹಿಸಿದ್ದಕ್ಕಾಗಿ ಇಬ್ಬರು ನಿರ್ದೇಶಕರು ಸೇರಿ ಗುಪ್ತಚರ ಸಂಸ್ಥೆಯ ಹಲವು ಅಧಿಕಾರಿಗಳ ವಿರುದ್ಧ ಪ್ರಕರಣದ ತನಿಖೆ ನಡೆಸಿದ್ದ ಸಿಬಿಐ ತಪ್ಪು ಹೊರಿಸಿತ್ತು. ಎನ್‌ಜಿಒಗಳ ವಿರುದ್ಧ ಈಗ ಐಬಿ ಹೊರಿಸಿರುವ ಆಪಾದನೆ ಕತೆಯೂ ಇದೇ ರೀತಿ ಟೊಳ್ಳಾಗಿದ್ದರೆ ಅಚ್ಚರಿಪಡಬೇಕಿಲ್ಲ.

ಇಷ್ಟಕ್ಕೂ ಹಿರಿಯ ವಿಜ್ಞಾನಿಗಳ ಹೆಸರಿಗೆ ಮಸಿ ಬಳಿಯಲು ಐಬಿ ಏಕೆ ಯತ್ನಿಸಿತು ಎಂದು ಹುಡುಕಲು ಹೋದರೆ ಅದೇ ಒಂದು ದೊಡ್ಡ ಕತೆ. ಅಂತರಿಕ್ಷಕ್ಕೆ ಉಪಗ್ರಹಗಳನ್ನು ಹಾರಿ ಬಿಡಲು ವಿದೇಶಿ ಉಡಾವಣಾ ವಾಹನಗಳನ್ನೇ ನಂಬಿಕೊಂಡಿದ್ದ ಇಸ್ರೊ, ಸ್ವಂತ ಕ್ರಯೋಜೆನಿಕ್ ರಾಕೆಟ್ ಅಭಿವೃದ್ಧಿಪಡಿಸುವ ಯೋಜನೆ ಹಾಕಿಕೊಂಡಿತ್ತು. ಈ ಯೋಜನೆ ಯಶಸ್ವಿಯಾದರೆ ವಿದೇಶಿ ಉಡಾವಣಾ ವಾಹನಗಳ ಮೇಲಿನ ಇಸ್ರೊ ಅವಲಂಬನೆ ತಪ್ಪುತ್ತದೆ ಎಂದು ಆತಂಕಗೊಂಡ ಐರೋಪ್ಯ ಮತ್ತು ಅಮೆರಿಕದ ಹಿತಾಸಕ್ತಿಗಳು, ಭಾರತದ ಕ್ರಯೋಜೆನಿಕ್ ರಾಕೆಟ್ ಯೋಜನೆಯ ಹಿಂದಿದ್ದ ಪ್ರಮುಖ ವಿಜ್ಞಾನಿಗಳಾದ ಶಶಿಕುಮಾರನ್ ಮತ್ತು ನಂಬಿ ನಾರಾಯಣ್ ವಿರುದ್ಧ ಐಬಿಯನ್ನು ಛೂ ಬಿಟ್ಟಿದ್ದವು. ಅಂದಿನ ನರಸಿಂಹ ರಾವ್ ಸರಕಾರದ ಅನುಮೋದನೆ ಇಲ್ಲದೆ ಐಬಿ ಈ ವಿಚಾರದಲ್ಲಿ ಮುಂದುವರಿಯಲು ಸಾಧ್ಯವಾಗುತ್ತಿರಲಿಲ್ಲ.

ಇದೇ ರೀತಿ, ಪರಮಾಣು ವಿಜ್ಞಾನಿ ಕ್ಯಾಪ್ಟನ್ ಬಿ ಕೆ ಸುಬ್ಬಾ ರಾವ್ ವಿರುದ್ಧ ಗುಪ್ತಚರ ಸಂಸ್ಥೆ 1988ರ ಮೇನಲ್ಲಿ ಆರೋಪದ ಕತೆ ಕಟ್ಟಿತ್ತು. ನ್ಯೂಯಾರ್ಕ್‌ಗೆ ತೆರಳುವ ಸಲುವಾಗಿ ಮುಂಬಯಿಯ ಸಹಾರಾ ವಿಮಾನ ನಿಲ್ದಾಣದಲ್ಲಿ ವಿಮಾನ ಹತ್ತುವ ವೇಳೆಯೇ ಅವರನ್ನು ಬಂಧಿಸಲಾಗಿತ್ತು. ರಾವ್ ಅವರು ಒಬ್ಬ ಗೂಢಾಚಾರ ಮತ್ತು ಭಾರತದ ಪರಮಾಣು ಯೋಜನೆಗಳಿಗೆ ಸಂಬಂಧಿಸಿದ ಗುಟ್ಟಿನ ಮಾಹಿತಿಗಳನ್ನು ಪಶ್ಚಿಮಕ್ಕೆ ಮಾರಿಕೊಳ್ಳಲು ಶಾಶ್ವತವಾಗಿ ದೇಶಬಿಟ್ಟು ಹೋಗುತ್ತಿದ್ದಾರೆ ಎಂಬ ಘನ ಆರೋಪವನ್ನು ರಾವ್ ಮೇಲೆ ಐಬಿ ಹೊರಿಸಿತ್ತು. ನ್ಯಾಯಾಲಯದ ಮುಂದೆ ಈ ಬಗ್ಗೆ ವಿಚಾರಣೆ ನಡೆಯಿತು. ರಾವ್ ಅವರು ದೇಶದಿಂದ ಹೊರ ಹೊತ್ತುಕೊಂಡು ಹೋಗುತ್ತಿದ್ದ ಅತ್ಯಂತ ರಹಸ್ಯದ ಕಡತ, ಐಐಟಿಗೆ ಅವರು ಸಲ್ಲಿಸಿದ್ದ ಅವರ ಡಾಕ್ಟರೇಟ್ ಪದವಿಯ ಮಹಾಪ್ರಬಂಧವಾಗಿತ್ತು! ಪರಮಾಣು ಸಂಸ್ಥೆಯಲ್ಲಿನ ಉನ್ನತ ಅಧಿಕಾರಿಗಳು ಮತ್ತು ವಿಜ್ಞಾನಿಗಳು ರಾವ್ ವಿರುದ್ಧ ನಿಂತಿದ್ದರು. ಕಾರಣವೂ ಸ್ಪಷ್ಟವಿತ್ತು; ಪರಮಾಣು ಜಲಾಂತರ್ಗಾಮಿ ಯೋಜನೆಯೊಂದರ ವಿನ್ಯಾಸದಲ್ಲಿ ರಾವ್ ಅವರು ಹಲವು ಅಡಚಣೆ ಮತ್ತು ಸಮಸ್ಯೆಗಳನ್ನು ಪಟ್ಟಿ ಮಾಡಿದ್ದರು. ಇದು ಉನ್ನತ ವಿಜ್ಞಾನಿಗಳ ಕಣ್ಣನ್ನು ಕೆಂಪಗಾಗಿಸಿದ್ದು ಮಾತ್ರವಲ್ಲ, ಅವರು ತೀವ್ರ ಮುಜುಗರ ಅನುಭವಿಸಲು ಕಾರಣವಾಗಿತ್ತು.

ಕೆಲವು ವರ್ಷಗಳ ಹಿಂದೆ ನನ್ನ ಸಹೋದ್ಯೋಗಿಯೊಬ್ಬರಿಗೆ ಅಮೆರಿಕ ಚಿಂತಕರ ಚಾವಡಿಯ ‘ರಹಸ್ಯ’ ವರದಿಯೊಂದು ಲಭಿಸಿತ್ತು. ಪೆಂಟಗನ್‌ಗೆ ಸಲ್ಲಿಕೆಯಾಗಿದ್ದ ಈ ವರದಿಯು ಭಾರತೀಯ ಸೇನೆ ಬಗ್ಗೆ ಅತ್ಯಂತ ಆಘಾತಕಾರಿ ಮತ್ತು ನಕಾರಾತ್ಮಕ ಟೀಕೆ-ಟಿಪ್ಪಣಿಗಳನ್ನು ಒಳಗೊಂಡಿತ್ತು. ಭಾರತೀಯ ಸೇನೆಯ ಹಿರಿಯ ಅಧಿಕಾರಿಗಳು ಅದಕ್ಷರು, ಅನರ್ಹರು ಮತ್ತು ಅವರು ಸ್ವಜಾತಿ, ಸ್ವವರ್ಗದ ಮಮಕಾರ ಹೊಂದಿದ್ದಾರೆ ಮುಂತಾದ ವಿವರಗಳನ್ನು ಇದು ಒಳಗೊಂಡಿತ್ತು. ಅಮೆರಿಕ ಚಿಂತಕರ ಚಾವಡಿಯ ಈ ವರದಿಯ ಮೂಲ ಭಾರತೀಯ ಗುಪ್ತಚರ ಸಂಸ್ಥೆಯಾಗಿತ್ತು. ಇದನ್ನು ಬಳಸಿಕೊಂಡು ನನ್ನ ಸಹೋದ್ಯೋಗಿ ಮಿತ್ರ ಅನನ್ಯ ಸುದ್ದಿ (ಎಕ್ಸ್‌ಕ್ಲೂಸಿವ್ ಸ್ಟೋರಿ) ಮಾಡಲು ತುದಿಗಾಲ ಮೇಲೆ ನಿಂತಿದ್ದರು. ಮೇಲ್ನೋಟಕ್ಕೆ ಇದು ಎಕ್ಸ್‌ಕ್ಲೂಸಿವ್ ಸ್ಟೋರಿಯಾಗುವ ಎಲ್ಲ ಲಕ್ಷಣಗಳನ್ನೂ ಪ್ರದರ್ಶಿಸಿತ್ತು. ಮಿತ್ರನ ‘ಎಕ್ಸ್‌ಕ್ಲೂಸಿವ್ ವರದಿ’ ಮುದ್ರಣವೂ ಆಯಿತು. ಕೊಂಚ ಕಾಲದಲ್ಲಿ ಮತ್ತೊಂದು ಸ್ಫೋಟಕ ಮಾಹಿತಿ
ನಮ್ಮೆದುರಿತ್ತು; ಭಾರತೀಯ ಸೇನೆಗೆ ಸಂಬಂಧಿಸಿದ ಅತ್ಯಂತ ಗುಟ್ಟಿನ ಈ ಕಡತ ದಿಲ್ಲಿಯ ಸಾರ್ವಜನಿಕ ಗ್ರಂಥಾಲಯದಲ್ಲೂ ಲಭ್ಯವಿತ್ತು! ಐಬಿ ಕೊಟ್ಟಿದ್ದ ಗುಟ್ಟಿನ ಕಡತ ದಿಲ್ಲಿಯ ಯುನೈಟೆಡ್ ಸರ್ವೀಸಸ್ ಇನ್‌ಸ್ಟಿಟ್ಯೂಟ್ ಲೈಬ್ರರಿಯಲ್ಲಿ ಲಭ್ಯವಿದ್ದ ಮಾಹಿತಿ ಎಂದು ತಿಳಿದ ಬಳಿಕ ನನ್ನ ಸಹೋದ್ಯೋಗಿ ಮಿತ್ರನ ಮುಜುಗರ ಊಹೆಗೂ ನಿಲುಕದಂತಿತ್ತು!

ಅಸಲಿಗೆ, ತಾನು ಹಂಚಿಕೊಳ್ಳುವ ಮಾಹಿತಿ ಅಥವಾ ವರದಿ ಬಗ್ಗೆ ಐಬಿ ತೀರಾ
ನಿರ್ಲಕ್ಷ್ಯದಿಂದ ಮತ್ತು ಅವಿವೇಕದಿಂದ ವರ್ತಿಸಬಲ್ಲದು. ದೇಶದಲ್ಲಿ
ಕಾರ್ಯನಿರ್ವಹಿಸುತ್ತಿರುವ ಕರ್ಮಠ ಮುಸ್ಲಿಂ ಸಂಘಟನೆಗಳ ಬಗ್ಗೆ ಗುಪ್ತಚರ ಸಂಸ್ಥೆಯಿಂದ ಮಾಹಿತಿ ಕಲೆ ಹಾಕುವಂತೆ ಒಮ್ಮೆ ನನ್ನ ಸಹೋದ್ಯೋಗಿ ಪತ್ರಕರ್ತೆಗೆ ಸೂಚಿಸಿದ್ದೆ. ಆಕೆ ತಂದ ಪಟ್ಟಿಯಲ್ಲಿ ಪ್ರತಿಷ್ಠಿತ ಮತ್ತು ಗೌರವಾನ್ವಿತ ಮುಸ್ಲಿಂ ಸಂಘಟನೆಗಳ ಹೆಸರುಗಳೂ ಸೇರಿದ್ದವು. ಗುಪ್ತಚರ ಸಂಸ್ಥೆಯೇ ಈ ಮಾಹಿತಿ ನೀಡಿದ್ದಾಗಿ ಆಕೆ ಅಲವತ್ತುಕೊಂಡರು. ಗೂಗಲ್‌ನಲ್ಲಿ ಲಭ್ಯವಿರುವ ಮುಸ್ಲಿಂ ವಿರೋಧಿ ವೆಬ್‌ಸೈಟ್ ಮೂಲದಿಂದ ಮಾಹಿತಿಗಳನ್ನು ಬಸಿದು ಗುಪ್ತಚರ ಸಂಸ್ಥೆ ನನ್ನ ಸಹೋದ್ಯೋಗಿ ಕೈಗೆ ಇಟ್ಟಿತ್ತು.

ಗ್ರೀನ್‌ಪೀಸ್ ಸೇರಿದಂತೆ ಹಲವು ಸ್ವಯಂ ಸೇವಾ ಸಂಘಟನೆಗಳ ಬಗ್ಗೆ ಐಬಿ ಮಾಡಿರುವ ಸಂಶೋಧನೆಯೂ ಇಂಥದ್ದೇ ಅಪಸವ್ಯವಾಗಿರಲಿಕ್ಕೂ ಸಾಕು. ಇದು ನರೇಂದ್ರ ಮೋದಿ ಅವರ ಭಾಷಣದ ತುಣುಕೊಂದನ್ನು ಹಾಗೇ ಕದ್ದು ಅಂಟಿಸಿರುವುದು ಮಾತ್ರವಲ್ಲ, ಉದ್ಯಮ ಮತ್ತು ಇನ್ನಿತರ ಪಟ್ಟಭದ್ರ ಹಿತಾಸಕ್ತಿಗಳ ಬಗೆಗೆ ಊರಿಗೇ ಗೊತ್ತಿರುವ ಸಂಗತಿಗಳನ್ನು ಪರಮ ಗುಟ್ಟಿನ ಸತ್ಯ ಎನ್ನುವಂತೆ ಸೇರಿಸಿ ವರದಿ ತಯಾರಿಸಿದೆ. ನಿಷ್ಪಕ್ಷಪಾತ ತನಿಖೆ ನಡೆದರೆ, ಐಬಿ ವರದಿ ಅಸತ್ಯ ಮತ್ತು ನಂಬಲಾಗದ್ದು ಎಂಬುದು ಖಚಿತವಾಗುತ್ತದೆ.

ಗುಪ್ತಚರ ಸಂಸ್ಥೆಯನ್ನು ದಿಲ್ಲಿಯಲ್ಲಿ ತಮಾಷೆಯಾಗಿ ‘ಕಲ್ಪನಾತೀತ ಇಲಾಖೆ’ ಎಂದು ಕರೆಯುತ್ತಾರೆ. ಇದರಲ್ಲಿ ಕಿಂಚಿತ್ತೂ ಅಚ್ಚರಿಯಿಲ್ಲ, ಅಲ್ಲವೇ? – ಅಜಿತ್ ಪಿಳ್ಳೈ. (ಕೃಪೆ: ಪ್ರಜಾವಾಣಿ, 24.06.14.)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s