Posts Tagged ‘: shivashailam ias’

http://www.udupibits.in news

ಉಡುಪಿ: ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ದಕ್ಷ ಮತ್ತು ಪ್ರಾಮಾಣಿಕ ವೈದ್ಯಾಧಿಕಾರಿ ಡಾ.ಶರತ್ ಕುಮಾರ್ ರಾವ್ ಅವರು ತನ್ನ ಅಮಾನತು ಆದೇಶದ ವಿರುದ್ಧ ಕರ್ನಾಟಕ ಆಡಳಿತಾತ್ಮಕ ನ್ಯಾಯ ಮಂಡಳಿ (ಕೆಎಟಿ)ಗೆ ಮೊರೆ ಹೋದ ಕಾರಣ ಅವರ ಅಮಾನತು ಆದೇಶವನ್ನು ಹಿಂಪಡೆಯಲು ಸಾಧ್ಯವಾಗಲಿಲ್ಲ ಎಂದು ಅಕ್ಟೋಬರ್ 19ರಂದು ಉಡುಪಿಯ ಅಜ್ಜರಕಾಡಿನಲ್ಲಿ ನಡೆದ ಬಹಿರಂಗ ಪ್ರತಿಭಟನಾ ಸಭೆಯಲ್ಲಿ ಉಡುಪಿ ವಿಧಾನಸಭಾ ಕ್ಷೇತ್ರದ ಶಾಸಕ ಪ್ರಮೋದ್ ಮಧ್ವರಾಜ್ ನೀಡಿದ ಸ್ಪಷ್ಟನೆಗೆ, ಅದೇ ವೇದಿಕೆಯಲ್ಲಿ ಮಾತನಾಡಿದ ಮಾಹಿತಿ ಹಕ್ಕು ಕಾರ್ಯಕರ್ತ ಶ್ರೀರಾಮ ದಿವಾಣ ಅವರು ಬಹಿರಂಗವಾಗಿಯೇ ಪ್ರತಿ ಸವಾಲು ಹಾಕಿದ ವಿದ್ಯಾಮಾನ ನಡೆದಿದೆ.

ಡಾ.ಶರತ್ ಕುಮಾರ್ ಇರಬಹುದು, ಬೇರೆ ಯಾರೇ ಇರಬಹುದು. ಅಮಾನತುಗೊಂಡವರು, ತಮ್ಮ ಅಮಾನತು ಆದೇಶದ ವಿರುದ್ಧ ಕೆಎಟಿಯ ಮೊರೆ ಹೋದಲ್ಲಿ ಅಂಥವರ ಅಮಾನತು ಆದೇಶವನ್ನು ಸರಕಾರ ಹಿಂಪಡೆಯಬಾರದು ಎಂಬ ಯಾವ ಕಾನೂನಾಗಲೀ, ನಿಯಮವಾಗಲೀ ಇಲ್ಲವೇ ಇಲ್ಲ. ಶಾಸಕರ ವಾದ ಖಡಾ ಖಂಡಿತವಾಗಿಯೂ ತಪ್ಪು ಮಾಹಿತಿ ಮತ್ತು ಸಾರ್ವಜನಿಕರನ್ನು ದಾರಿ ತಪ್ಪಿಸುವ ಹಾಗೂ ಸಾರ್ವಜನಿಕರಲ್ಲಿ ಗೊಂದಲವನ್ನು ಮೂಡಿಸುವ ಯತ್ನವಾಗಿದ್ದು, ಇದು ವಾಸ್ತವಾಂಶದಿಂದ ನುಣುಚಿಕೊಳ್ಳುವ ತಂತ್ರವಲ್ಲದೆ ಬೇರೇನೂ ಅಲ್ಲ ಎಂದು ಶ್ರೀರಾಮ ದಿವಾಣ ತಿಳಿಸಿದರು.

ಶಾಸಕರಾದವರು ವಿಷಯವನ್ನು ತಜ್ಞರೊಂದಿಗೆ ಸರಿಯಾಗಿ ಸಮಾಲೋಚಿಸಿ ಮನವರಿಕೆ ಮಾಡಿಕೊಳ್ಳದೆ, ಒಟ್ಟಾರೆ ಮಾತನಾಡುವುದು ಎಷ್ಟು ಮಾತ್ರಕ್ಕೂ ಸರಿಯಲ್ಲ. ಈ ವಿಷಯದಲ್ಲಿ ಯಾವಾಗ, ಎಲ್ಲಿ ಬೇಕಾದರೂ ತಾನು ಬಹಿರಂಗ ಚರ್ಚೆಗೆ ಸಿದ್ದ ಎಂದು ಪ್ರತಿಭಟನಾ ಸಭೆಯಲ್ಲಿ ಪ್ರಮೋದ್ ಮಧ್ವರಾಜ್ ಭಾಷಣದ ಬಳಿಕ ಮಾತನಾಡಿದ ಶ್ರೀರಾಮ ದಿವಾಣ ಹೇಳಿದರು.

ಕಳೆದೊಂದು ವರ್ಷದಿಂದ ಡಾ.ಶರತ್ ಕುಮಾರ್ ಅಮಾನತು ಮತ್ತು ಬಹುಕೋಟಿ ರಾಸಾಯನಿಕ ಹಗರಣಕ್ಕೆ ಸಂಬಂಧಿಸಿದಂತೆ ತಾನು ಮೂರು ಬಾರಿ ಮುಖ್ಯಮಂತ್ರಿಗಳಿಗೆ ದೂರು ಸಲ್ಲಿಸಿದ್ದೇನೆ. ಮಂಗಳೂರಿನ ಹಿರಿಯ ನ್ಯಾಯವಾದಿ ಪುರುಷೋತ್ತಮ ಶೆಟ್ಟಿ, ಉಡುಪಿಯ ಖ್ಯಾತ ಮನೋವೈದ್ಯರಾದ ಡಾ.ಪಿ.ವಿ.ಭಂಡಾರಿ ಸಹಿತ ಇನ್ನೂ ಕೆಲವರು ಸಹ ಮುಖ್ಯಮಂತ್ರಿಗಳಿಗೆ ಮನವಿಗಳನ್ನು ನೀಡಿದ್ದಾರೆ. ಆದರೆ ಇದುವರೆಗೂ ಯಾರೊಬ್ಬರ ಯಾವೊಂದು ದೂರಿಗೂ ಮುಖ್ಯಮಂತ್ರಿಗಳ ಕಚೇರಿ ಅಧಿಕಾರಿಗಳು ಕನಿಷ್ಟ ಸ್ಪಂದನೆಯನ್ನೂ ವ್ಯಕ್ತಪಡಿಸಲಿಲ್ಲ. ಆದರೆ ಬೇರೆ ವಿಷಯಗಳಿಗೆ ಸಂಬಂಧಿಸಿದಂತೆ ನೀಡಿದ ದೂರಿಗೆ ಮುಖ್ಯಮಂತ್ರಿಗಳ ಕಚೇರಿ ಅಧಿಕಾರಿಗಳು ಸ್ಪಂದಿಸಿ ಪತ್ರ ಬರೆಯುತ್ತಿರುವುದು ನಡೆಯುತ್ತಿದೆ. ಬಹುಕೋಟಿ ರಾಸಾಯನಿಕ ಹಗರಣದಲ್ಲಿ ಭಾಗಿಯಾಗಿರುವ ಉಡುಪಿ ಜಿಲ್ಲಾಸ್ಪತ್ರೆಯ ಅಧಿಕಾರಿಯೊಬ್ಬರ ಹತ್ತಿರದ ಸಂಬಂಧಿಯೊಬ್ಬರು ಮುಖ್ಯಮಂತ್ರಿ ಕಚೇರಿಯಲ್ಲಿ ಆಯಕಟ್ಟಿನ ಹುದ್ಧೆಯಲ್ಲಿರುವುದೇ ಇದಕ್ಕೆ ಕಾರಣ ಎಂಬುದು ಇದೀಗ ಗಮನಕ್ಕೆ ಬಂದಿದೆ ಎಂದು ಶ್ರೀರಾಮ ದಿವಾಣ ಸಭೆಯಲ್ಲಿ ಬಹಿರಂಗಪಡಿಸಿದರು.

ಡಾ.ಶರತ್ ಅಮಾನತು ಹಾಗೂ ರಾಸಾಯನಿಕ ಹಗರಣಕ್ಕೆ ಸಂಬಂಧಪಟ್ಟಂತೆ ಈಗಾಗಲೇ ತಾನು ಖುದ್ದು ಮುಖ್ಯಮಂತ್ರಿ ಸಿದ್ಧರಾಮಯ್ಯ ಅವರನ್ನು ಬೆಂಗಳೂರಿನಲ್ಲಿ ಭೇಟಿಯಾಗಿ ಎಲ್ಲಾ ವಿಚಾರಗಳನ್ನೂ ಅವರ ಗಮನಕ್ಕೆ ತಂದು, ಮನವಿಯನ್ನೂ ಸಲ್ಲಿಸಿದ್ದೇನೆ ಎಂದು ಶ್ರೀರಾಮ ದಿವಾಣ ತಿಳಿಸಿದರು.

‘ಇದು, ಜಿಲ್ಲಾಸ್ಪತ್ರೆಯ ರಕ್ತನಿಧಿ ಉಳಿಸುವ ಹೋರಾಟವೂ ಹೌದು’

ಪ್ರಸ್ತುತ ನಡೆಯುತ್ತಿರುವ ಹೋರಾಟ ಕೇವಲ ಡಾ.ಶರತ್ ಪರವಾಗಿ ನಡೆಯುತ್ತಿರುವ ಹೋರಾಟವಷ್ಟೇ ಅಲ್ಲ. ಇದು ಉಡುಪಿ ಜಿಲ್ಲಾಸ್ಪತ್ರೆಯ ರಕ್ತನಿಧಿ ವಿಭಾಗವನ್ನು ಉಳಿಸುವ ಹೋರಾಟವೂ ಆಗಿದೆ. ಕಾರಣ, ಡಾ.ಶರತ್ ಅವರ ವಿರುದ್ಧ ಷಡ್ಯಂತ್ರ ಹೂಡಿರುವ ಪ್ರಕರಣದ ಹಿಂದೆ ಉಡುಪಿ ಜಿಲ್ಲಾಸ್ಪತ್ರೆಯ ರಕ್ತನಿಧಿ ವಿಭಾಗವನ್ನು ನಾಶಪಡಿಸುವ ಹುನ್ನಾರವೂ ಇದೆ. ರಕ್ತದಂಧೆ ನಡೆಸುತ್ತಿರುವ ಖಾಸಗಿ ಉದ್ಯಮಿಗಳ ಹುನ್ನಾರವೂ ಇದರ ಹಿಂದೆ ಇದೆ ಎಂದು ಶ್ರೀರಾಮ ದಿವಾಣ ಗಂಭೀರ ಆರೋಪವನ್ನೂ ಪ್ರತಿಭಟನಾ ಸಭೆಯಲ್ಲಿ ಮಾಡಿದರು.

‘ವೀಣಾ ಶೆಟ್ಟಿಗೆ ನ್ಯಾಯ ಸಿಗಬೇಕಾದರೆ, ಅಫಿದವಿತ್ ನ ಮೂಲ ಪ್ರತಿ ಹಾಜರುಪಡಿಸಬೇಕು’

ನಮ್ಮದು ಡಾ.ಶರತ್ ಅವರಿಗೆ ನ್ಯಾಯ ಕೇಳುವುದು ಮಾತ್ರವಲ್ಲ, ಡಾ.ಶರತ್ ವಿರುದ್ಧ ದೂರು ನೀಡಿದ ವೀಣಾ ಶೆಟ್ಟಿ ಅವರಿಗೆ ನ್ಯಾಯ ಕೇಳುವ ಹೋರಾಟವೂ ಹೌದು. ವೀಣಾ ಶೆಟ್ಟಿ ಅವರಿಗೆ ನ್ಯಾಯ ಲಭಿಸಬೇಕಾದರೆ, ಯಾವ ಅಫಿದವಿತ್ ನ ಜೆರಾಕ್ಸ್ ಪ್ರತಿಯನ್ನು ನೀಡಿ ವೀಣಾ ಶೆಟ್ಟಿಯವರು ಡಾ.ಶರತ್ ವಿರುದ್ಧ ದೂರು ನೀಡಿದ್ದಾರೋ, ಆ ಅಫಿದವಿತ್ ನ ಮೂಲ ಪ್ರತಿಯನ್ನು ದೂರು ನೀಡಿದ ವೀಣಾ ಶೆಟ್ಟಿ ಅಥವಾ ವೀಣಾ ಶೆಟ್ಟಿಯವರ ಮೂಲಕ ದೂರು ಕೊಡಿಸಿದ ವ್ಯಕ್ತಿಗಳು ಇನ್ನಾದರೂ ಪ್ರಕರದ ತನಿಖೆ ನಡೆಸುತ್ತಿರುವ ಉಡುಪಿ ನಗರ ಪೊಲೀಸ್ ಠಾಣೆಯ ಕ್ರೈಂ ಸಬ್ ಇನ್ಸ್ ಪೆಕ್ಟರ್ ರಾಜ್ ಗೋಪಾಲ್ ಅವರಿಗೆ ತಂದೊಪ್ಪಿಸಬೇಕು. ಪೊಲೀಸರ ತನಿಖೆಗೆ ವೀಣಾ ಶೆಟ್ಟಿ, ಇಲ್ಲವೇ ವೀಣಾ ಶೆಟ್ಟಿಯವರ ಹಿಂದಿರುವ ವ್ಯಕ್ತಿಗಳು ಸಹಕರಿಸಿದರೆ ಮಾತ್ರ ವೀಣಾ ಶೆಟ್ಟಿಯವರಿಗೆ ನ್ಯಾಯ ಲಭಿಸಲು ಸಾಧ್ಯ. ವೀಣಾ ಶೆಟ್ಟಿಯವರು ಆರೋಗ್ಯ ಇಲಾಖಾಧಿಕಾರಿಗಳಿಗೆ ನೀಡಿದ ಅಫಿದವಿತ್ ಅಸಲಿ ಎಂದಾದರೆ, ಅಮಾನತಿನಲ್ಲಿರುವ ಡಾ.ಶರತ್ ಕರ್ತವ್ಯದಿಂದ ವಜಾ (ಡಿಸ್ ಮಿಸ್) ಆಗಲಿದ್ದಾರೆ . ಮಾತ್ರವಲ್ಲ, ಜೈಲು ಶಿಕ್ಷೆಗೂ ಒಳಗಾಗುವುದು ಖಂಡಿತಾ ಎಂದು ಶ್ರೀರಾಮ ದಿವಾಣ ಮಾರ್ಮೀಕವಾಗಿ ಹೇಳಿದರು.

ಪ್ರಕರಣ ಕೆಎಟಿಯಲ್ಲಿರುವಾಗ ರಕ್ತನಿಧಿಗೆ ಬೇರೊಬ್ಬರನ್ನು ನೇಮಕ ಮಾಡಲು ಅವಕಾಶವಿದೆಯೇ ?: ಶಾಸಕರಿಗೆ ಶ್ರೀರಾಮ ದಿವಾಣ ಪ್ರಶ್ನೆ

ಅಮಾನತು ಆದೇಶದ ವಿರುದ್ಧ ಕೆಎಟಿ ಮೊರೆ ಹೋದ ಕಾರಣ, ಡಾ.ಶರತ್ ಕುಮಾರ್ ರಾವ್ ಅವರ ಅಮಾನತು ಆದೇಶವನ್ನು ಹಿಂಪಡೆದುಕೊಳ್ಳಲು ಸಾಧ್ಯವಾಗುವುದಿಲ್ಲ ಎಂಬ ಶಾಸಕ ಪ್ರಮೋದ್ ಮಧ್ವರಾಜ್ ಅವರ ಹೇಳಿಕೆಗೆ ಪ್ರತಿಯಾಗಿ ಅ.20ರಂದು ಪತ್ರಿಕಾ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿರುವ ಮಾಹಿತಿ ಹಕ್ಕು ಕಾರ್ಯಕರ್ತ ಶ್ರೀರಾಮ ದಿವಾನ ಅವರು, ಹಾಗಾದರೆ ಪ್ರಕರಣ ಕೆಎಟಿಯಲ್ಲಿರುವಾಗ, ಸರಕಾರ ರಕ್ತನಿಧಿ ವಿಭಾಗಕ್ಕೆ ಬೇರೊಬ್ಬ ಅಧಿಕಾರಿಯನ್ನು ನೇಮಕಾತಿ ಮಾಡಿದ್ದು ಹೇಗೆ ಮತ್ತು ಹೀಗೆ ನೇಮಕಾತಿ ಮಾಡಲು ಕಾನೂನಿನಲ್ಲಿ ಅವಕಾಶ ಇದೆಯೇ ಎಂದು ಖಾರವಾಗಿ ಪ್ರಶ್ನಿಸಿದ್ದಾರೆ.

ಡಾ.ಶರತ್ ಕುಮಾರ್ ರಾವ್ ಅವರು ಮೊರೆ ಹೋದ ಕಾರಣದಿಂದಲೇ ಅವರ ಅಮಾನತು ಆದೇಶ ಹಿಂಪಡೆಯಲು ಸಾಧ್ಯವಾಗಲಿಲ್ಲ ಎಂಬುದನ್ನು ಪ್ರತಿಭಟನಾ ಸಭೆಯಲ್ಲಿ ಶಾಸಕ ಪ್ರಮೋದ್ ಮಧ್ವರಾಜ್ ಅವರು ಬಹಿರಂಗವಾಗಿಯೇ ಘೋಷಿಸಿರುವುದರಿಂದ, ಅವರು ಈ ವಿಷಯವನ್ನು ಲಿಖಿತವಾಗಿ ತಿಳಿಸುವ ಸ್ಪಷ್ಟಪಡಿಸಬೇಕು. ಪ್ರತಿಭಟನಾ ಸಭೆಯಲ್ಲಿ ಡಾ.ಪಿ.ವಿ.ಭಂಡಾರಿಯವರ ನೇತೃತ್ವದಲ್ಲಿ ಹಲವಾರು ಮಂದಿ ಪ್ರಮುಖರ ಸಹಿ ಇರುವ ನಾಗರಿಕರು ಸಲ್ಲಿಸಿರುವ ಮನವಿಗೆ ಪ್ರತಿಯಾಗಿ ಈ ಬಗ್ಗೆ ಶಾಸಕರು ಲಿಖಿತವಾಗಿ ಹಿಂಬರಹ ನೀಡಲಿ ಎಂದು ಶ್ರೀರಾಮ ದಿವಾಣ ಅವರು ಪತ್ರಿಕಾ ಪ್ರಕಟಣೆಯಲ್ಲಿ ಸವಾಲು ಹಾಕಿದ್ದಾರೆ.

http://www.udupibits.in news

ಉಡುಪಿ: ಮಹಾಭಾರತ ಯುದ್ಧದಲ್ಲಿ ಬೃಹನ್ನಳೆಯನ್ನು ಮುಂದಿಟ್ಟುಕೊಂಡು ಯುದ್ಧ ಮಾಡಿದಂತೆ, ದಕ್ಷ ವೈದ್ಯಾಧಿಕಾರಿ ಡಾ.ಶರತ್ ಕುಮಾರ್ ರಾವ್ ಅವರ ವಿರುದ್ಧ ಸ್ತ್ರೀ ಒಬ್ಬಾಕೆಯನ್ನು ಮುಂದಿರಿಸಿಕೊಂಡು ಸರಕಾರಿ ಅಧಿಕಾರಿಗಳು ಅನ್ಯಾಯ ಮಾಡುತ್ತಿದ್ದಾರೆ ಎಂದು ಫಾದರ್ ವಿಲಿಯಂ ಮಾರ್ಟಿಸ್ ಅವರು ಅಭಿಪ್ರಾಯಪಟ್ಟಿದ್ದಾರೆ.

ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ಪ್ರಾಮಾಣಿಕ ವೈದ್ಯಾಧಿಕಾರಿ ಡಾ.ಶರತ್ ಕುಮರ್ ಅವರನ್ನು ಅಸಂವಿದಾನಿಕವಾಗಿ ಅಮಾನತು ಮಾಡಿದ್ದೂ ಅಲ್ಲದೆ, ಕಳೆದ ಒಂದು ವರ್ಷ ಒಂದು ತಿಂಗಳಿಂದಲೂ ತನಿಖೆಯನ್ನೂ ನಡೆಸದೆ, ಜೀವಾನಾಂಶವನ್ನೂ ಸರಿಯಾಗಿ ನೀಡದೆ ಅಮಾನವೀಯವಾಗಿ ನಡೆಸಿಕೊಳ್ಳುತ್ತಿರುವ ಸರಕಾರದ ಕ್ರಮವನ್ನು ಖಂಡಿಸಿ ಇಂದು (19.10.2014) ಬೆಳಗ್ಗೆ ಉಡುಪಿ ನಗರದ ಗಾಂಧಿ ಪ್ರತಿಮೆ ಮುಂಭಾಗದಲ್ಲಿ ನಡೆದ ಪ್ರತಿಭಟನಾ ಸಭೆಯಲ್ಲಿ ಅವರು ಮಾತನಾಡುತ್ತಿದ್ದರು.

ಡಾ.ಶರತ್ ಅವರಿಗೆ ಅನ್ಯಾಯವಾಗಿದೆ ಎನ್ನುವುದನ್ನು ಲಭ್ಯವಿರುವ ದಾಖಲೆಗಳೇ ಸ್ಪಷ್ಟಪಡಿಸುತ್ತದೆ. ಹೀಗೆ ಮಾಡುವುದು ಮಾನವ ಹಕ್ಕುಗಳ ಉಲ್ಲಂಘನೆಯೂ ಹೌದು. ಸರಕಾರಿ ಅಧಿಕಾರಿಗಳು ಜನಪ್ರತಿನಿಧಿಗಳನ್ನು ದಾರಿ ತಪ್ಪಿಸುವ ಪ್ರಕ್ರಿಯೆಯೂ ಈ ಪ್ರಕರಣದಲ್ಲಿ ನಡೆದಿದೆ. ಇನ್ನಾದರೂ ಡಾ.ಶರತ್ ಅವರಿಗೆ ಸರಕಾರ ನ್ಯಾಯ ಒದಗಿಸಿಕೊಡಬೇಕು ಎಂದು ಫಾ.ವಿಲಿಯಂ ಮಾರ್ಟಿಸ್ ಒತ್ತಾಯಿಸಿದರು.

ಉಡುಪಿ ತಾಲೂಕು ಪಂಚಾಯತ್ ಸದಸ್ಯ ಸತ್ಯಾನಂದ ನಾಯಕ್, ಉಡುಪಿ ಜಿಲ್ಲಾ ನಾಗರಿಕ ಸಮಿತಿ ಪ್ರಧಾನ ಕಾರ್ಯದರ್ಶಿ ನಿತ್ಯಾನಂದ ಒಳಕಾಡು, ನಿವೃತ್ತ ಸರಕಾರಿ ನೌಕರರ ಸಂಘದ ಅಧ್ಯಕ್ಷರಾದ ಎಸ್.ಎಸ್.ತೋನ್ಸೆ, ಹಿರಿಯ ಸಮಾಜ ಸೇವಕರಾದ ಹೂವಯ್ಯ ಸೇರ್ವೇಗಾರ್ ಉಪ್ಪೂರು, ಮಾಹಿತಿ ಹಕ್ಕು ಹೋರಾಟಗಾರರಾದ ಕೆ.ಎಸ್.ಉಪಾಧ್ಯ, ನಿವೃತ್ತ ಬ್ಯಾಂಕ್ ಅಧಿಕಾರಿ ಕೆ.ಆರ್.ಕಾಮತ್, ಹಿರಿಯ ಸಾಹಿತಿ ಮುರಳೀಧರ ಉಪಾಧ್ಯ ಹಿರಿಯಡಕ, ನಗರ ಸಭಾ ಸದಸ್ಯ ಮಹೇಶ್ ಠಾಕೂರ್, ಲಕ್ಷ್ಮೀನಾರಾಯಣ ಉಪಾಧ್ಯ, ವಾಸುದೇವ ಕಾಮತ್ ಕುಂದಾಪುರ, ರಕ್ತದಾನಿ ದಿವಾಕರ ಖಾರ್ವಿ, ಉಪನ್ಯಾಸಕ ಮಂಜಪ್ಪ ಗೋಣಿ, ಸಮಾಜ ಸೇವಕರಾದ ರಾಘವೇಮದ್ರ ಪ್ರಭು ಕರ್ವಾಲು, ರೊನಾಲ್ಡ್ ಕ್ಯಾಸ್ತಲಿನೋ ಶಂಕರಪುರ, ಶೇಖರ ಶೆಟ್ಟಿ ಹೆಬ್ರಿ, ಪ್ರಭಾತ್ ಕಲ್ಕೂರ, ನಾಗರಾಜ್, ಚಂದ್ರಶೇಖರ ಶೆಟ್ಟಿ ವಂಡ್ಸೆ, ಡಾ.ದೀಪಕ್ ಮಲ್ಯ, ಡಾ.ಕಿರಣ್ ಆಚಾರ್ಯ ಸಹಿತ ಅನೇಕ ಮಂದಿ ಪ್ರಮುಖರು ಪ್ರತಿಭಟನಾ ಸಭೆಯಲ್ಲಿ
ಭಾಗವಹಿಸಿದ್ದರು. ಚಿತ್ರ : ಶ್ರೀರಾಮ ದಿವಾಣ.

http://www.udupibits.in news

ಉಡುಪಿ: ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ದಕ್ಷ ಮತ್ತು ಪ್ರಾಮಾಣಿಕ ವೈದ್ಯಾಧಿಕಾರಿಯಾಗಿದ್ದು ಕಳೆದ ಒಂದು ವರ್ಷ ಒಂದು ತಿಂಗಳ ಹಿಂದೆ ರಾಜ್ಯ ಸರಕಾರದಿಂದ ಅಸಂವಿಧಾನಿಕವಾಗಿ ಅಮಾನತುಗೊಳಿಸಲ್ಪಟ್ಟ ಡಾ.ಶರತ್ ಕುಮಾರ್ ರಾವ್ ಅವರ ಅಮಾನತು ಆದೇಶವನ್ನು ರದ್ದುಗೊಳಿಸಿ, ಅವರನ್ನು ಕೂಡಲೇ ಉಡುಪಿ ರಕ್ತನಿಧಿಗೆ ನಿಯುಕ್ತಿಗೊಳಿಸಬೇಕು ಎಂದು ಆಗ್ರಹಿಸಿ ಇಂದು (19.10.2014) ಪೂರ್ವಾಹ್ನ ನಾಗರಿಕರು ಉಡುಪಿ ನಗರದಲ್ಲಿ ಬೃಹತ್ ಪ್ರತಿಭಟನೆ ನಡೆಸಿದರು.

ಉಡುಪಿ ಸರ್ವಿಸ್ ಬಸ್ ನಿಲ್ದಾಣ ಪರಿಸರದ ಗಾಂಧಿ ಪ್ರತಿಮೆ ಮುಂಭಾಗದಲ್ಲಿ ಜಮಾಯಿಸಿದ ನೂರಾರು ಮಂದಿ ಪ್ರಮುಖರು ಮೊದಲಿಗೆ ಸಭೆ ನಡೆಸಿದರು. ಸಭೆಯನ್ನುದ್ಧೇಶಿಸಿ ಫಾದರ್ ವಿಲಿಯಂ ಮಾರ್ಟಿಸ್, ವಾಲ್ಟರ್ ಸಿರಿಲ್ ಪಿಂಟೋ ಹಾಗೂ ಡಾ.ಪಿ.ವಿ.ಭಂಡಾರಿ ಮಾತನಾಡಿದರು.

ಬಳಿಕ ಕವಿ ಮುದ್ಧಣ ಮಾರ್ಗ, ಕೋರ್ಟ್ ರಸ್ತೆ, ಹಳೆ ತಾಲೂಕು ಕಚೇರಿ ಬಳಿಯ ಶಾಸಕರ ಕಚೇರಿ ಎದುರುಗಡೆಯಾಗಿ ಅಜ್ಜರಕಾಡಿನಲ್ಲಿರುವ ಹುತಾತ್ಮ ಸೈನಿಕರ ಯುದ್ಧ ಸ್ಮಾರಕದ ಮುಂದೆ ಪ್ರತಿಭಟನಾ ಸಭೆ ನಡೆಸಿದರು.

ಇಲ್ಲಿ ಸರಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಸುಬ್ರಹ್ಮಣ ಶೇರಿಗಾರ್, ಹಿರಿಯ ನ್ಯಾಯವಾದಿ ಕೆ.ಕೆ.ಭಂಡಾರ್ಕರ್, ಶಾಸಕ ಪ್ರಮೋದ್ ಮಧ್ವರಾಜ್, ನ್ಯಾಯವಾದಿ ಬೈಕಾಡಿ ಸುಪ್ರಸಾದ್ ಶೆಟ್ಟಿ, ಜಿಲ್ಲಾ ಪಂಚಾಯತ್ ಸದಸ್ಯ ಮತ್ತು ಮಾಜಿ ಅಧ್ಯಕ್ಷ ಉಪೇಂದ್ರ ನಾಯಕ್, ಸಮಾಜ ಸೇವಕರಾದ ವಿಶು ಶೆಟ್ಟಿ ಅಂಬಲಪಾಡಿ, ಜಯ ಕರ್ನಾಟಕ ಸಂಘಟನೆಯ ಜಿಲ್ಲಾದ್ಯಕ್ಷರಾದ ಜನನಿ ದಿವಾಕರ ಶೆಟ್ಟಿ, ಮಾಹಿತಿ ಹಕ್ಕು ಕಾರ್ಯಕರ್ತ ಶ್ರೀರಾಮ ದಿವಾಣ, ಎಚ್.ಐ.ವಿ. ಮತ್ತು ಲಿಂಗತ್ವ ಅಲ್ಪಸಂಖ್ಯಾತರ ಪರ ಹೋರಾಟಗಾರ ಸಂಜೀವ ವಂಡ್ಸೆ ಮೊದಲಾದವರು ನ್ಯಾಯ ಪರವಾಗಿ ಮಾತನಾಡಿದರು.

ಪ್ರತಿಭಟನಾ ಸಭೆ ನಡೆಯುತ್ತಿದ್ದ ಸ್ಥಳಕ್ಕೆ ಆಗಮಿಸಿದ ಶಾಸಕ ಪ್ರಮೋದ್ ಮಧ್ವರಾಜ್ ಅವರಿಗೆ ಸ್ಥಳದಲ್ಲಿಯೇ ಮನವಿ ನೀಡಲಾಯಿತು. ಪ್ರತಿಭಟನೆಯ ನೇತೃತ್ವ ವಹಿಸಿದ್ದ ಐವರ ನಿಯೋಗ ಜಿಲ್ಲಾಸ್ಪತ್ರೆಗೆ ತೆರಳಿ, ಜಿಲ್ಲಾಸ್ಪತ್ರೆಯ ಮೂಲಕ ರಾಜ್ಯ ಆರೋಗ್ಯ ಇಲಾಖಾ ಪ್ರಧಾನ ಕಾರ್ಯದರ್ಶಿ ಎನ್.ಶಿವಶೈಲಂ ಹಾಗೂ ರಾಜ್ಯ ಸರಕಾರದ ಮುಖ್ಯ ಕಾರ್ಯದರ್ಶಿ ಕೌಶಿಕ್ ಮುಖರ್ಜಿ ಅವರಿಗೆ ಮನವಿ ಸಲ್ಲಿಸಿದರು. ಚಿತ್ರಗಳು : ಶ್ರೀರಾಮ ದಿವಾಣ.

http://www.udupibits.in news

ಉಡುಪಿ: ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತಿನಿಧಿ ವಿಭಾಗದಲ್ಲಿ ಕಳೆದ 12 ವರ್ಷಗಳಿಮದ ಪ್ರಾಮಾಣಿಕತೆಯಿಂದ ಸೇವೆ ಸಲ್ಲಿಸುತ್ತಿದ್ದ ದಕ್ಷ ವೈದ್ಯಾಧಿಕಾರಿ ಡಾ.ಶರತ್ ಕುಮಾರ್ ರಾವ್ ಜೆ. ಅವರನ್ನು ಅಸಂವಿಧಾನಿಕವಾಗಿ ಅಮಾನತು ಮಾಡಿದ್ದೂ ಅಲ್ಲದೆ, ಅಮಾನತುಗೊಳಿಸಿ ಒಂದು ವರ್ಷ ಕಳೆದರೂ, ಇಲಾಖಾ ತನಿಖೆಯನ್ನೂ ನಡೆಸದೆ, ಅಮಾನತು ಆದೇಶವನ್ನೂ ಹಂತೆಗೆದುಕೊಳ್ಳದೆ, ಜೀವನಾಂಶವನ್ನೂ ಸರಿಯಾಗಿ ನೀಡದೆ ಅವರ ಮಾನವಹಕ್ಕುಗಳನ್ನು ಕಸಿದುಕೋಲ್ಳುತ್ತಿರುವ ರಾಜ್ಯ ಸರಕಾರದ ಕ್ರಮದ ವಿರುದ್ಧ ಅಕ್ಟೋಬರ್ 19ರಂದು ಬೆಳಗ್ಗೆ 11 ಗಂಟೆಗೆ ನಗರದಲ್ಲಿ ಪ್ರತಿಭಟನಾ ಮೆರವಣಿಗೆ ಮತ್ತು ಬಳಿಕ ಅಜ್ಜರಕಾಡಿನಲ್ಲಿ ಅನಿರ್ಧಿಷ್ಠಾವಧಿ ಸತ್ಯಾಗ್ರಹ ಶಿಬಿರ ನಡೆಸಲು ಡಾ.ಶರತ್ ಹಿತೈಷಿಗಳ ಸಭೆ ನಿರ್ಧರಿಸಿದೆ.

ಖ್ಯಾತ ಮನೋವೈದ್ಯರಾದ ಡಾ.ಪಿ.ವಿ.ಭಂಡಾರಿಯವರ ನೇತೃತ್ವದಲ್ಲಿ ಅಕ್ಟೋಬರ್ 15ರಂದು ಸಂಜೆ ನಗರದ ಖಾಸಗಿ ಹೋಟೇಲ್ ಸಭಾಂಗಣದಲ್ಲಿ ನಡೆದ ಡಾ.ಭಂಡಾರಿ ಬೆಂಬಲಿಗರ ಮತ್ತು ಡಾ.ಶರತ್ ಕುಮಾರ್ ರಾವ್ ಅಭಿಮಾನಿಗಳ ಸಭೆಯಲ್ಲಿ ಡಾ.ಶರತ್ ಅಮಾನತು ಪ್ರರಕಣದ ಬಗ್ಗೆ ಚರ್ಚಿಸಿ, ಮುಂದಿನ ಹೋರಾಟದ ರೂಪುರೇಷೆಗಳ ಕುರಿತು ಕೆಲವು ಹತ್ವದ ತೀರ್ಮಾನಗಳನ್ನು
ತೆಗೆದುಕೊಳ್ಳಲಾಯಿತು.

ಆರೋಗ್ಯ ಸಚಿವ ಯು.ಟಿ.ಖಾದರ್ (ಮೊಬೈಲ್ ನಂ. 9448383919) ಹಾಗೂ ಆರೋಗ್ಯ ಇಲಾಖಾ ಪ್ರಧಾನ ಕಾರ್ಯದರ್ಶಿ ಎನ್. ಶಿವಶೈಲಂ (ಮೊಬೈಲ್ ನಂ. 9448990310) ಅವರಿಗೆ ಡಾ.ಶರತ್ ಪರವಾಗಿ ಎಸ್.ಎಂ.ಎಸ್.ಅಭಿಯಾನ ಪ್ರಾರಂಭಿಸಲು ನಿರ್ಧರಿಸಲಾಯಿತು. ನಗರದ ಸಿಟಿ ಬಸ್ ನಿಲ್ದಾಣದ ಬಳಿಯ ಸದಾನಂದ ಟವರ್ಸ್ ಲ್ಲಿರುವ ಮಾನಸ ಕ್ಲಿನಿಕ್ ನ್ನು ಹೋರಾಟಕ್ಕೆ ಪೂರಕವಾಗಿ ಸಭೆ ಇತ್ಯಾದಿ ನಡೆಸಲು ಹೋರಾಟಗಾರರ ಕಚೇರಿಯನ್ನಾಗಿ ಪರಿವರ್ತಿಸುವುದಾಗಿಯೂ ಡಾ.ಭಂಡಾರಿ ಘೋಷಿಸಿದರು. ಆಸ್ಪತ್ರೆಗಳ ಪ್ರಯೋಗಾಲಯ ಹಗರಣದ ಬಗ್ಗೆ ಹಳ್ಳಿ
ಹಳ್ಳಿಗಳಲ್ಲಿ ಪ್ರಾಜೆಕ್ಟ್ ಹಾಕಿ ಸಾವ್ಝನಿಕರಿಗೆ ಮಾಹಿತಿ ನೀಡುವ ಮೂಲಕ ಜನಜಾಗೃತಿ ರೂಪಿಸಲು ತಾನು ಸಿರ್ದಧನಿರುವುದಾಗಿಯೂ ಡಾ.ಪಿ.ವಿ.ಭಂಡಾರಿ ಪ್ರಕಟಿಸಿದರು.

ಅಕ್ಟೋಬರ್ 11ರಂದು ಬೆಳಗ್ಗೆ 11 ಗಂಟೆಗೆ ಉಡುಪಿ ಸರ್ವಿಸ್ ಬಸ್ ನಿಲ್ದಾಣದ ಗಾಂಧಿ ಪ್ರತಿಮೆ ಮುಂಭಾಗದಲ್ಲಿ ಸೇರಿ, ಇಲ್ಲಿಂದ ಅಜ್ಜರಕಾಡು ಜಿಲ್ಲಾಸ್ಪತ್ರೆಗೆ ಪ್ರತಿಭಟನಾ ಮೆರವಣಿಗೆ ನಡೆಸುವುದು, ಬಳಿಕ ಜಿಲ್ಲಾಸ್ಪತ್ರೆ ಮುಂಭಾಗದಲ್ಲಿ ಅಥವಾ ಅಜ್ಜರಕಾಡು ಗಾಂಧಿ ಪಾರ್ಕ್ ಮುಂಭಾಗದಲ್ಲಿ ಅನಿರ್ಧಿಷ್ಠಾವಧಿ ಸತ್ಯಾಗ್ರಹ ಶಿಬಿರ ನಡೆಸುವುದು. ಈ ಶಿಬಿರದಲ್ಲಿ ಡಾ.ಪಿ.ವಿ.ಭಂಡಾರಿಯವರು ಪ್ರತಿಭಟನಾರ್ಥವಾಗಿ ಉಚಿತವಾಗಿ ಚಿಕಿತ್ಸೆ ಮತ್ತು ಔಷಧಗಳನ್ನು ನೀಡುವ ಮೂಲಕ ಸತ್ಯಾಗ್ರಹ ಕ್ಲಿನಿಕ್ನ್ನೂ ಆರಂಭಸುವುದು ಎಂದು ನಿರ್ಣಯ ತೆಗೆದುಕೊಳ್ಳಲಾಯಿತು.

ಅಮಾನತು ಎಂದರೆ ಶಿಕ್ಷೆಯಲ್ಲ ಎಂದು ಆರೋಗ್ಯ ಇಲಾಖಾ ಪ್ರಧಾನ ಕಾರ್ಯದರ್ಶಿ ಎನ್.ಶಿವಶೈಲಂ ಹೇಳುತ್ತಾರೆ. ಆದರೆ, ಮಾನ-ಮರ್ಯಾದೆ ಇರುವವರಿಗೆ ಅಮಾನತು ಕೂಡಾ ಶಿಕ್ಷೆಯೇ ಆಗುತ್ತದೆ. ಡಾ.ಶರತ್ ಕುಮಾರ್ ರಾವ್ ವಿರುದ್ಧ ನಡೆಯುತ್ತಿರುವುದು ಸರಕಾರಿ ಪ್ರಾಯೋಜಿತ ಹಿಂಸೆಯಾಗಿದೆ. ತನಗೆ ಯಾರ ಮೇಲೆಯೂ ವಯುಕ್ತಿಕ ಧ್ವೇಷವಿಲ್ಲ. ಆದರೆ ರಾಜಕಾರಣಿಗಳು, ಅಧಿಕಾರಿಗಳು ಹಾಗೂ ಈ ವ್ಯವಸ್ಥೆಯ ಬಗ್ಗೆ ಸಿಟ್ಟಿದೆ ಎಂದು ಡಾ.ಪಿ.ವಿ.ಭಂಡಾರಿ ಹೇಳಿದರು.

ಪ್ರಕರಣದ ಬಗ್ಗೆ ನ್ಯಾಯಾಲಯದಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ (ಪಿಐಎಲ್) ದಾಖಲಿಸಬೇಕು, ಆರೋಗ್ಯ ಸಚಿವರು ಜಿಲ್ಲೆಗೆ ಬಂದಾಗಲೆಲ್ಲ ಮುತ್ತಿಗೆ ಹಾಕಬೇಕು, ಡಾ.ಶರತ್ ಅವರನ್ನು ಬೆಂಬಲಿಸಿ ರಕ್ತದಾನ ಶಿಬಿರ ಹಮ್ಮಬೇಕು, ಆರೋಗ್ಯ ಸಚಿವರಿಗೆ ಪ್ರತಿಯೊಬ್ಬರು ತಮ್ಮ ತಮ್ಮ ದೇಹದಿಂದ ರಕ್ತ ತೆಗೆದು ಬಾಟಲಿಯಲ್ಲಿ ಕಳುಹಿಸಿಕೊಡಬೇಕು, ಡಾ.ಶರತ್ ಅವರ ಅಮಾನತು ನಾಗರಿಕ ಸಮಾಜಕ್ಕೆ ಮಾಡಿದ ಅಪಮಾನ, ಶಾಸಕ ಪ್ರಮೋದ್ ಮಧ್ವರಾ, ಸಚಿವ ವಿನಯ ಕುಮಾರ್ ಸೊರಕೆ ಕಚೇರಿಗಳ ಮುಂದೆ ಬೃಹತ್ ಪ್ರತಿಭಟನೆ ಆಯೋಜಿಸಬೇಕು ಎಂಬಿತ್ಯಾದಿ ಅಭಿಪ್ರಾಯಗಳನ್ನು ಸಭೆಯಲ್ಲಿ ಭಾಗವಹಿಸಿದ ಪ್ರಮುಖರು ಮಂಡಿಸಿದರು.

ಫಾದರ್ ವಿಲಿಯಂ ಮಾರ್ಟಿಸ್, ಕೆ.ಎಂ.ಉಡುಪ, ಮನೋಹರ ಭಂಡಾರ್ಕರ್, ಜಯಕರ ಶೆಟ್ಟಿ ಇಂದ್ರಾಳಿ, ಕಾಪು ಲೀಲಾಧರ ಶೆಟ್ಟಿ, ಭಾಸ್ಕರ ರೈ ಬ್ರಹ್ಮಾವರ, ಸುರೇಂದ್ರ ನಾಯಕ್, ಬೈಕಾಡಿ ಸುಪ್ರಸಾದ್ ಶೆಟ್ಟಿ, ಜನನಿ ದಿವಾಕರ ಶೆಟ್ಟಿ, ಗೀತಾ ಶೇಟ್, ವಿಶು ಶೆಟ್ಟಿ ಅಂಬಲಪಾಡಿ, ವಾಲ್ಟರ್ ವಿಲಿಯಂ ಪಿಂಟೊ, ಪುರುಷೋತ್ತಮ ಸಾಲಿಯಾನ್, ಟಿ.ಅಂಗಾರ, ರಾಘವೇಂದ್ರ ಪ್ರಭು ಕರ್ವಾಲು, ನಾಗಭೂಷಣ ಶೇಟ್, ಸಂಜೀವ ವಂಡ್ಸೆ ಮೊದಲಾದವರ ಸಹಿತ ಇನ್ನೂರಕ್ಕೂ ಅಧಿಕ ಮಂದಿ ಪೂರ್ವಭಾವೀ ಸಭೆಯಲ್ಲಿ ಪಾಲ್ಗೊಂಡಿದ್ದರು.

http://www.udupibits.in news

ತನಿಖಾ ವರದಿ : ಶ್ರೀರಾಮ ದಿವಾಣ.
ಉಡುಪಿ: ಸರಕಾರ, ಸಾರ್ವಜನಿಕ ಸೇವೆಗೆ ಉಪಯೋಗಿಸಲೆಂದು ಲಯನ್ಸ್ ಕ್ಲಬ್ ಗೆ ಕೊಡುಗೆಯಾಗಿ ನೀಡಿದ ಅಂಬ್ಯುಲೆನ್ಸ್ ನ್ನು ಬಸ್ರೂರು ರಾಜೀವ್ ಶೆಟ್ಟಿ ಎಂಬವರು ತನ್ನ ಸ್ವಂತ ಹೆಸರಿಗೆ ಬದಲಾಯಿಸಿಕೊಂಡು ಸುಧೀರ್ಘ ಎಂಟು ವರ್ಷಗಳ ಕಾಲ ಅಕ್ರಮವಾಗಿ ಮನೆ ಕೆಲಸಕ್ಕೆ ದುರ್ಬಳಕೆ ಮಾಡಿಕೊಂಡು ಅಂತಿಮವಾಗಿ ಗುಜರಿಗೆ ಹಾಕುವ ಪರಿಸ್ಥಿತಿ ತಲುಪಿದಾಗ ಇಂಡಿಯನ್ ರೆಸ್ ಕ್ರಾಸ್ ಸೊಸೈಟಿಗೆ ಹಸ್ತಾಂತರಿಸಿ ಕೈತೊಳೆದುಕೊಳ್ಳುವ ಮೂಲಕ ಹಾಡಹಗಲೇ ಸರಕಾರ, ಲಯನ್ಸ್ ಕ್ಲಬ್ ಮತ್ತು ರೆಡ್ ಕ್ರಾಸ್ ಸೊಸೈಟಿಯನ್ನು ವಂಚಿಸಿದ ಪ್ರಕರಣವೊಂದು ದಾಖಲಾತಿಗಳ ಸಹಿತ ಇದೀಗ ಬಹಿರಂಗಕ್ಕೆ ಬಂದಿದೆ.

ಕಾಗ್ರೆಸ್ ಪಕ್ಷದ ನಾಯಕರಾದ ಆಸ್ಕರ್ ಫೆರ್ನಾಂಡಿಸ್ ಅವರು, ತಮ್ಮ ರಾಜ್ಯ ಸಭಾ ಸದಸ್ಯತ್ವದ ಪ್ರದೇಶಾಭಿವೃದ್ಧಿ ನಿಧಿಯಿಂದ 2000-2001ನೇ ಸಾಲಿನಲ್ಲಿ ಉಡುಪಿ ಲಯನ್ಸ್ ಕ್ಲಬ್ ಗೆಂದು ಅಂಬ್ಯುಲೆನ್ಸ್ ಒಂದನ್ನು ಕೊಡುಗೆಯಾಗಿ ನೀಡುತ್ತಾರೆ. 25.08.2000 ರಲ್ಲಿ ಉಡುಪಿ ಲಯನ್ಸ್ ಕ್ಲಬ್ ಅಧ್ಯಕ್ಷರ ಹೆಸರಿನಲ್ಲಿ ಇದು ನೋಂದಣಿಯಾಗುತ್ತದೆ.

ಮೊದಲ ಮೂರು ವರ್ಷಗಳ ಕಾಲ ಈ ಅಂಬ್ಯುಲೆನ್ಸ್ ಸದುದ್ಧೇಶಕ್ಕೆ ಬಳಕೆಯಾಗಿದೆಯೋ, ದುರ್ಬಳಕೆಯಾಗಿದೆಯೋ ಎಂಬ ಬಗ್ಗೆ ಖಚಿತ ಮಾಹಿತಿ ಲಭ್ಯವಿಲ್ಲ. ಆದರೆ, ಬಳಿಕದ ಸುಧೀರ್ಘ ಎಂಟು ವರ್ಷಗಳ ಕಾಲ ಈ ಸರಕಾರಿ ಅಂಬ್ಯುಲೆನ್ಸ್ ಕೆಲಸ ಮಾಡಿದ್ದು, ಬಸ್ರೂರು ರಾಜೀವ್ ಶೆಟ್ಟಿಯವರ ಸ್ವಂತದ ಸ್ವಾರ್ಥ ಉದ್ಧೇಶಗಳಿಗಾಗಿ ಮಾತ್ರ ಎಂಬುದು ಯಾವ ಅನುಮಾನಕ್ಕೂ ಎಡೆಯಿಲ್ಲದಂತೆ ಸ್ಪಷ್ಟವಾಗುತ್ತದೆ.

ಉಡುಪಿ ಲಯನ್ಸ್ ಕ್ಲಬ್ ಅಧ್ಯಕ್ಷರ ಹೆಸರಿನಲ್ಲಿದ್ದ ಸರಕಾರಿ ಅಂಬ್ಯುಲೆನ್ಸ್ ನ್ನು, 2003ರ ಫೆಬ್ರವರಿ 9ರಂದು ಬಸ್ರೂರು ರಾಜೀವ್ ಶೆಟ್ಟಿ ತನ್ನ ಹೆಸರಿಗೆ
ಮಾಡಿಸಿಕೊಳ್ಳುತ್ತಾರೆ. ‘ಮಿಸ್ಟರ್ ಎಂ.ಜೆ.ಎಫ್. ಲಯನ್, ಬಸ್ರೂರು ರಾಜೀವ್ ಶೆಟ್ಟಿ, ಸನ್ ಆಫ್ ಶಿವರಾಮ ಶೆಟ್ಟಿ, 11-2-70 ಇ, ಪದ್ಮಜ, ಉಡುಪಿ’ ಎಂಬ ಹೆಸರಿಗೆ
ಅಂಬ್ಯುಲೆನ್ಸ್ ವರ್ಗಾವಣೆಯಾಗುತ್ತದೆ. ಆಶ್ಚರ್ಯವೆಂದರೆ, ಈ ವಿಳಾಸ ಬಸ್ರೂರು ರಾಜೀವ್ ಶೆಟ್ಟಿಯವರ ಮನೆಯ ವಿಳಾಸವಾಗಿರುವುದು.

ಆಸ್ಕರ್ ಫೆರ್ನಾಂಡಿಸ್ ಅವರು ಸರಕಾರದಿಂದ ಲಭ್ಯವಾಗುವ ಪ್ರದೇಶಾಭಿವೃದ್ಧಿ ನಿಧಿಯಿಂದ ಸಾರ್ವಜನಿಕರ ಉಪಯೋಗಕ್ಕೆಂದು 2000 ರಲ್ಲಿ ಲಯನ್ಸ್ ಕ್ಲಬ್ ಗೆ ಕೊಡಮಾಡಿದ ನೀಡಿದ ಅಂಬ್ಯುಲೆನ್ಸ್, 2003ರಿಂದ 2011ರ ವರೆಗೆ, ಎಂಟು ವರ್ಷಗಳ ಕಾಲ ಉಡುಪಿ ಮತ್ತು ಕುಂದಾಪುರ ತಾಲೂಕಿನಾದ್ಯಂತ ಅಕ್ರಮವಾಗಿ ಬಳಕೆಯಾಗಿದೆ. ತೋಟಕ್ಕೆ ಗೊಬ್ಬರ ಹಾಕುವುದರ ಸಹಿತ ವಿವಿಧ ರೀತಿಯ ಖಾಸಗಿ ಕೆಲಸಗಳಿಗೆ ನಿರಂತರವಾಗಿ ದುರ್ಬಳಕೆಯಾದ ಕಾರಣ, ಅಂಬ್ಯುಲೆನ್ಸ್ ಗುಜರಿಗೆ ಹಾಕುವ ಹಂತ ತಲುಪಿದೆ.

ಅಂತಿಮ ಹಂತದಲ್ಲಿ ಬಸ್ರೂರು ರಾಜೀವ್ ಶೆಟ್ಟಿಯವರ ತಲೆಗೆ ಹೊಳೆದ ಮಹಾನ್ ಐಡಿಯಾವೇ, ಅಂಬ್ಯುಲೆನ್ಸ್ ನ್ನು ಗುಜರಿಗೆ ಹಾಕುವ ಬದಲು ಇಂಡಿಯನ್ ರೆಡ್ ಕ್ರಾಸ್ ಸೊಸೈಟಿಯ ಉಡುಪಿ ಜಿಲ್ಲಾ ಶಾಖೆಗೆ ಹಸ್ತಾಂತರಿಸಿ ಬಿಡುವುದು ! 2011ರ ಮಾರ್ಚ್ 9ರಂದು ಅಂಬ್ಯುಲೆನ್ಸ್ ಬಸ್ರೂರು ರಾಜೀವ್ ಶೆಟ್ಟಿ ಹೆಸರಿನಿಂದ ಇಂಡಿಯನ್ ರೆಡ್ ಕ್ರಾಸ್ ಸೊಸೈಟಿಯ ಉಡುಪಿ ಜಿಲ್ಲಾ ಶಾಕೆಯ ಕಾರ್ಯದರ್ಶಿ ಹೆಸರಿಗೆ ಬದಲಾಗಿ ಬಿಡುತ್ತದೆ.

ಇಂಡಿಯನ್ ರೆಡ್ ಕ್ರಾಸ್ ಸೊಸೈಟಿಯ ಕಾರ್ಯದರ್ಶಿ ಹೆಸರಿಗೆ ಅಂಬ್ಯುಲೆನ್ಸ್ ನೋಂದಣಿಯಾದ ನಂತರ, ರೆಡ್ ಕ್ರಾಸ್ ಮೂಲಕ, ರೆಡ್ ಕ್ರಾಸ್ ಖಜಾನೆಯಿಂದ ಅಂಬ್ಯುಲೆನ್ಸ್ ದುರಸ್ತಿಗೆ ನಿರ್ಣಯ ತೆಗೆದುಕೊಳ್ಳಲಾಗುತ್ತದೆ. ಇದಕ್ಕಾಗಿ ಬರೋಬ್ಬರಿ ಒಂದು ಲಕ್ಷ ರು.ಗಳಿಗೂ ಅಧಿಕ ಹಣವನ್ನು ರೆಡ್ ಕ್ರಾಸ್ ಸೊಸೈಟಿ ಕರ್ಚು ಮಾಡುತ್ತದೆ.

ಅಕ್ರಮ ಅನುಮೋದಿಸದ ಡಾ.ಶರತ್..

2011ರಲ್ಲಿ ಬಸ್ರೂರು ರಾಜೀವ್ ಶೆಟ್ಟಿ ಉಡುಪಿ ರೆಡ್ ಕ್ರಾಸ್ ಸೊಸೈಟಿಯ ಸಭಾಪತಿಯಾಗಿದ್ದರೆ, ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ವೈದ್ಯಾಧಿಕಾರಿಯಾದ ಡಾ.ಶರತ್ ಕುಮಾರ್ ರಾವ್ ಅವರು ಉಪ ಸಭಾಪತಿಯಾಗಿದ್ದರು. ಪ್ರಾಮಾಣಿಕರೂ, ದಕ್ಷರು ಆದ ಉಪ ಸಭಾಪತಿ ಡಾ.ಶರತ್ ಕುಮಾರ್ ರಾವ್ ಅವರು, ಸಭಾಪತಿ ಬಸ್ರೂರು ರಾಜೀವ್ ಶೆಟ್ಟಿಯವರ ಅಂಬ್ಯುಲೆನ್ಸ್ ಅಕ್ರಮಕ್ಕೆ ಸಹಮತ ವ್ಯಕ್ತಪಡಿಸಿದೆ, ಇರ್ಣವನ್ನು ಅನುಮೋದಿಸದೆ, ವಿರೋಧ ವ್ಯಕ್ತಪಡಿಸುತ್ತಾರೆ. ಈ ಬಗ್ಗೆ ರೆಡ್ ಕ್ರಾಸ್ ಸಭಾಪತಿ ಬಸ್ರೂರು ರಾಜೀವ್ ಶೆಟ್ಟಿ ಹಾಗೂ ರೆಡ್ ಕ್ರಾಸ್ ಸೊಸೈಟಿಯ ಜಿಲ್ಲಾಧ್ಯಕ್ಷರೂ ಆಗಿರುವ ಜಿಲ್ಲಾಧಿಕಾರಿ ಡಾ.ಎಂ.ಟಿ.ರೇಜು ಅವರಿಗೆ ಲಿಖಿತವಾಗಿ ಆಕ್ಷೇಪ ದಾಖಲಿಸಿ, ಸೂಕ್ತ ಕ್ರಮಕ್ಕೆ ಮನವಿ ಮಾಡುತ್ತಾರೆ ಡಾ.ಶರತ್.

ಪರಿಣಾಮ ಮಾತ್ರ ಶೂನ್ಯ, ಧ್ವೇಷ ಸಾಧನೆ !

2011ರ ಮೇ 12ರಂದು ಡಾ.ಶರತ್ ಅವರು ನೀಡಿದ ದೂರಿನ ಮೇಲೆ ಈವರೆಗೂ ಜಿಲ್ಲಾಧಿಕಾರಿಗಳೂ, ರೆಡ್ ಕ್ರಾಸ್ ಸೊಸೈಟಿಯ ಜಿಲ್ಲಾಧ್ಯಕ್ಷರೂ ಆದ ಜಿಲ್ಲಾಧಿಕಾರಿಗಳು ತನಿಖೆ ನಡೆಸಿಲ್ಲ. ಆದರೆ..

ಅಂಬ್ಯುಲೆನ್ಸ್ ಅಕ್ರಮ ಹಗರಣಕ್ಕೆ ಸಂಬಂಧಿಸಿದಂತೆ, ಡಾ.ಶರತ್ ಕುಮಾರ್ ರಾವ್ ಅವರು ಅನುಮೋದನೆ ನೀಡದೆ ಲಿಖಿತವಾಗಿಯೇ ಆಕ್ಷೇಪ ದಾಖಲಿಸಿದ ಪರಿಣಾಮವಾಗಿ ಬಸ್ರೂರು ರಾಜೀವ್ ಶೆಟ್ಟಿಯವರು ತೀವ್ರ ಮುಜುಗರ ಅನುಭವಿಸಿದರು. ಡಾ.ಶರತ್ ವಿರುದ್ಧ ಭಾರೀ ಆಕ್ರೋಶ, ಸಿಟ್ಟು, ಧ್ವೇಷ ಪ್ರದರ್ಶಿಸತೊಡಗಿದರು.

ಈ ಧ್ವೇಷ ಸಾಧನೆಯ ಮುಂದುವರಿದ ಭಾಗವಾಗಿಯೇ, ಬಳಿಕ ಡಾ.ಶರತ್ ಕುಮಾರ್ ರಾವ್ ವಿರುದ್ಧ ರೆಡ್ ಕ್ರಾಸ್ ಸೊಸೈಟಿ, ಪೊಲೀಸ್ ಠಾಣೆ, ಆರೋಗ್ಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಮದನ್ ಗೋಪಾಲ್ ಹಾಗೂ ಆರೋಗ್ಯ ಇಲಾಖೆಯ ಜಾಗೃತಕೋಶದಲ್ಲಿ ಮಹಿಳೆಯೊಬ್ಬರ ಮೂಲಕ ಸುಳ್ಳು ದೂರು ಸಲ್ಲಿಕೆಯ ಪ್ರಹಸನ ಆರಂಭವಾಯಿತು.

ಡಾ.ಶರತ್ ಕುಮಾರ್ ರಾವ್ ವಿರುದ್ಧ, ಮಹಿಳೆಯೊಬ್ಬಾಕೆ ಎಲ್ಲೆಲ್ಲಾ ದೂರು ನೀಡಿದ್ದಾರೋ, ಅಲ್ಲೆಲ್ಲಾ ದೂರು ಕೊಟ್ಟ ಕೆಲವೇ ದಿನಗಳ ಅಂತರದಲ್ಲಿ ದೂರಿನ ಬಗ್ಗೆ ತನಿಖೆಯಾಗುತ್ತದೆ. ಇಂತಹ ತನಿಖೆಗಳೆಲ್ಲವೂ ಪೂರ್ವಾಗ್ರಹದಿಂದಲೂ, ಪಕ್ಷಪಾತದಿಂದಲೂ, ಏಕಪಕ್ಷೀಯವಾಗಿಯೂ ನಡೆಯುತ್ತಿದ್ದವು. ಪರಿಣಾಮವಾಗಿ, ತನಿಖಾ ವರದಿಗಳೆಲ್ಲವೂ ಡಾ.ಶರತ್ ವಿರುದ್ಧವೇ ಸೃಷ್ಟಿಯಾಗುತ್ತಿದ್ದವು. ರೆಡ್ ಕ್ರಾಸ್ ಸೊಸೈಟಿಯಲ್ಲಿ ಸಭಾಪತಿ ಬಸ್ರೂರು ರಾಜೀವ್ ಶೆಟ್ಟಿಯವರು ತನಿಖೆಯನ್ನೇ ನಡೆಸದೆ ಡಾ.ಶರತ್ ಕುಮಾರ್ ರಾವ್ ಅವರನ್ನು ಏಕಪಕ್ಷೀಯವಾಗಿ ಉಪ ಸಭಾಪತಿ ಸ್ಥಾನದಿಂದ ಮತ್ತು ಆಡಳಿತ ಮಂಡಳಿ ಸದಸ್ಯತ್ವದಿಂದ ಉಚ್ಛಾಟಿಸುತ್ತಾರೆ.

ಡಾ.ಶರತ್ ಕುಮಾರ್ ಅವರನ್ನು ರೆಡ್ ಕ್ರಾಸ್ ಸೊಸೈಟಿಯಿಂದ ಉಚ್ಛಾಟಿಸುವ ಬಸ್ರೂರು ರಾಜೀವ್ ಶೆಟ್ಟಿ, ಡಾ.ಶರತ್ ಉಚ್ಛಾಟನೆಯಿಂದ ಕಾಲಿ ಬೀಳುವ ಸ್ಥಾನಕ್ಕೆ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಅಧಿಕಾರಿ ಡಾ.ರಾಮಚಂದ್ರ ಬಾಯಿರಿ ಅವರನ್ನು ನೇಮಕ ಮಾಡುತ್ತಾರೆ.

ಬಸ್ರೂರು ರಾಜೀವ್ ಶೆಟ್ಟಿಯವರು ರೆಡ್ ಕ್ರಾಸ್ ಸೊಸೈಟಿಯಲ್ಲಿ ತನಗೊಂದು ಸ್ಥಾನ ಕಲ್ಪಿಸಿಕೊಟ್ಟದ್ದಕ್ಕೆ ಪ್ರತಿಯಾಗಿ ಕೃತಜ್ಞತೆ ಸಲ್ಲಿಸುವ ಪ್ರಕ್ರಿಯೆಯ ಭಾಗವಾಗಿ, ಶ್ರೀಮತಿ ವೀಣಾ ಶೆಟ್ಟಿ ಡಾ.ಶರತ್ ವಿರುದ್ಧ ಆರೋಗ್ಯ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಮದನ್ ಗೋಪಾಲ್ ಅವರಿಗೆ ನೀಡಿದ ದೂರಿಗೆ ಸಂಬಂಧಿಸಿದಂತೆ ಪ್ರಧಾನ ಕಾರ್ಯದರ್ಶಿಯವರಿಂದ ಪೂರ್ವ ನಿರ್ಧರಿತ ಸಂಚಿನ ಭಾಗವಾಗಿ ತನಿಖಾಧಿಕಾರಿಯಾಗಿ ನಿಯುಕ್ತಗೊಳ್ಳುವ ಡಿಎಚ್ಓ ಡಾ.ರಾಮಚಂದ್ರ ಬಾಯಿರಿಯವರು ಡಾ.ಶರತ್ ಕುಮಾರ್ ವಿರುದ್ಧ ಪ್ರಧಾನ ಕಾರ್ಯದರ್ಶಿಯವರಿಗೆ ವರದಿ ಸಲ್ಲಿಸುತ್ತಾರೆ.

ಆರೋಗ್ಯ ಇಲಾಖೆಯ ಭ್ರಷ್ಟರಿಗೂ, ಬಸ್ರೂರು ರಾಜೀವ್ ಶೆಟ್ಟಿಯವರಿಗೂ ಅದೆಂಥದ್ದೋ ಸಂಬಂಧ ? ಪ್ರಧಾನ ಕಾರ್ಯದರ್ಶಿಯಾಗಿದ್ದ ಮದನ್ ಗೋಪಾಲ್, ನಿರ್ದೇಶಕರಾದ ಡಾ.ಧನ್ಯ ಕುಮಾರ್, ಉಪ ನಿರ್ದೇಶಕರಾದ ಡಾ.ಕೆ.ಬಿ.ಈಸ್ವರಪ್ಪ, ಡಿಎಚ್ಓ ಡಾ.ರಾಮಚಂದ್ರ ಬಾಯಿರಿ, ಜಿಲ್ಲಾ ಸರ್ಜನ್ ಡಾ.ಆನಂದ ನಾಯ್ಕ್, ಬಸ್ರೂರು ರಾಜೀವ್ ಶೆಟ್ಟಿ ಸಹಿತ ಇನ್ನೂ ಕೆಲವರು ಷಡ್ಯಂತ್ರದಲ್ಲಿ ಒಂದಾಗುತ್ತಾರೆ. ತೆರೆಮರೆಯಲ್ಲಿ ಭಾಗಿಯಾಗುತ್ತಾರೆ. ದಕ್ಷರೂ, ಪ್ರಾಮಾಣಿಕರೂ ಆದ ಡಾ.ಶರತ್ ಕುಮಾರ್ ರಾವ್ ಅವರನ್ನು ಜೀವಂತವಾಗಿ ಮುಗಿಸುವ ಕೆಲಸ ಅತ್ಯಂತ ವ್ಯವಸ್ಥಿತವಾಗಿ ನಡೆಯುತ್ತದೆ. ಈ ಪ್ರಕ್ರಿಯೆ ಈಗಲೂ ಮುಂದುವರಿದಿದೆ.

ಮದನ್ ಗೋಪಾಲ್ ಆರೋಗ್ಯ ಇಲಾಖೆಯಿಂದ ವರ್ಗಾವಣೆಗೊಂಡು ಸರಕಾರದ ಹೆಚ್ಚುವರಿ ಪ್ರಧಾನ ಕಾರ್ಯದರ್ಶಿಯಾದ ಬಳಿಕ, ಮದನ್ ಗೋಪಾಲ್ ಅವರಿಂದ ತೆರವಾದ ಪ್ರಧಾನ ಕಾರ್ಯದಶರ್ಿ ಸ್ಥಾನ ವಹಿಸಿಕೊಂಡ ಶಿವಶೈಲಂ ಎಂಬವರು ಸಹ ಇತ್ತೀಚೆಗೆ ಉಡುಪಿಗೆ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಲು ಬಂದವರು, ಬಸ್ರೂರು ಜೊತೆಗೆ ರೆಡ್ ಕ್ರಾಸ್ ಸೊಸೈಟಿಗೆ ಭೇಟಿ ನೀಡಿ ಗುಂಪು ಫೋಟೋಗಡೆ ಫೋಸ್ ಕೊಡುತ್ತಾರೆ. ಜೊತೆಯಾಗಿ ಉಪಹಾರ ಸೇವಿಸಿ ಧನ್ಯತೆ ಅನುಭವಿಸುತ್ತಾರೆ !

ಉಡುಪಿ: ಅಕ್ಟೋಬರ್ 19ರ ಒಳಗೆ ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ವೈದ್ಯಾಧಿಕಾರಿ ಡಾ.ಶರತ್ ಕುಮಾರ್ ರಾವ್ ಅವರ ಅಮಾನತು ಆದೇಶವನ್ನು ಹಿಂಪಡೆದುಕೊಂಡು, ಉಡುಪಿ ಜಿಲ್ಲಾಸ್ಪತ್ರೆಯ ರಕ್ತನಿಧಿ ವಿಭಾಗಕ್ಕೆ ನಿಯುಕ್ತಿ ಮಾಡದೇ ಹೋದಲ್ಲಿ ಜಿಲ್ಲಾಸ್ಪತ್ರೆಯ ಮುಂಭಾಗದಲ್ಲಿ ‘ಸತ್ಯಾಗ್ರಹ ಕ್ಲಿನಿಕ್’ ಸ್ಥಾಪಿಸಿ, ಬಡವರಿಗೆ ಉಚಿತವಾಗಿ ಚಿಕಿತ್ಸೆ ನೀಡಲು ಆರಂಭಿಸುತ್ತೇನೆ. ಜಿಲ್ಲಾಸ್ಪತ್ರೆಯ ಅಧಿಕೃತರು ಹಾಗೂ ಸರಕಾರ ಮಾಡಿದ ದೋಷವನ್ನು ತಾನು ಈ ರೀತಿಯಲ್ಲಿ ಪರಿಹಾರ ಮಾಡಿಕೊಳ್ಳಲು
ನಿರ್ಧರಿಸಿದ್ದೇನೆ. ಸತ್ಯಾಗ್ರಹ ಕ್ಲಿನಿಕ್ ನ ಉದ್ಘಾಟನಾ ಸಮಾರಂಭಕ್ಕೆ ಆರೋಗ್ಯ ಸಚಿವ ಯು.ಟಿ.ಖಾದರ್, ಜಿಲ್ಲಾ ಉಸ್ತುವಾರಿ ಸಚಿವ ವಿನಯ ಕುಮಾರ್ ಸೊರಕೆ ಹಾಗೂ ಶಾಸಕ ಪ್ರಮೋದ್ ಮಧ್ವರಾಜ್ ಅವರನ್ನು ಆಮಂತ್ರಿಸುತ್ತೇನೆ..

ಹೀಗೆಂದು ಖಡಾಖಂಡಿತ ಮಾತುಗಳಲ್ಲಿ ಘೊಷಿಸಿದವರು ಖ್ಯಾತ ಮನೋವೈದ್ಯರಾದ ಡಾ.ಪಿ.ವಿ. ಭಂಡಾರಿಯವರು. ನಕಲಿ ಅಫಿಡವಿಟ್ ಮುಂದಿಟ್ಟುಕೊಂಡು ಮಹಿಳೆಯೊಬ್ಬರು ನೀಡಿದ ಸುಳ್ಳು ದೂರಿನ ಆಧಾರದಲ್ಲಿ ನ್ಯಾಯಯುತವಾಗಿ ತನಿಖೆ ನಡೆಸದೆ ಅಪ್ರಜಾತಾಂತ್ರಿಕವಾಗಿ ಅಮಾನತು ಶಿಕ್ಷೆಗೆ ಒಳಗಾದ ಡಾ.ಶರತ್ ಕುಮಾರ್ ರಾವ್ ಅವರನ್ನು ಅಮಾನತು ಮಾಡಿ ಒಂದು ವರ್ಷ ಒಂದು ತಿಂಗಳಾದ ಹಿನ್ನೆಲೆಯಲ್ಲಿ, ಈ ಅಮಾನತು ಕ್ರಮವನ್ನು ಖಂಡಿಸಿ, ಇಂದು ಬೆಳಗ್ಗೆ ಜಿಲ್ಲಾಸ್ಪತ್ರೆಯ ಮುಂಭಾಗದಲ್ಲಿ ನಡೆದ ಪ್ರತಿಭಟನಾ ಸಭೆಯಲ್ಲಿ ಅವರು
ಮಾತನಾಡುತ್ತಿದ್ದರು.

ಸತ್ಯಾಗ್ರಹ ಕ್ಲಿನಿಕ್ ಆರಂಭಿಸಿ ಮತ್ತೆ 15 ದಿನಗಳಾದರೂ ಡಾ.ಶರತ್ ಕುಮಾರ್ ರಾವ್ ಅವರ ಅಮಾನತು ಆದೇಶ ಹಿಂಪಡೆಯದಿದ್ದಲ್ಲಿ, ಡಾ.ಶರತ್ ಬೆಳಕಿಗೆ ತಂದ ರಾಸಾಯನಿಕ ಹಗರಣ ಮತ್ತು ಅಮಾನತು ಪ್ರಕಿಯೆಯ ಸಮಗ್ರ ಚಿತ್ರಣ ಮತ್ತು ಇದರ ಹಿಂದೆ ಯಾರ್ಯಾರು ಇದ್ದಾರೆ, ಯಾರು ಏನು ಮಾಡಿದ್ದಾರೆ ಎಂಬಿತ್ಯಾದಿಯಾಗಿ ಸವಿವರ ಮಾಹಿತಿಗಳಿರುವ ‘ಮಿಸ್ಸಿಂಗ್ ಅಫಿಡವಿಟ್’ ಎಂಬ ಪುಸ್ತಕವನ್ನು ಪ್ರಕಟಿಸಿ ಬಿಡುಗಡೆ ಮಾಡಲಾಗುವುದು. ಈ ಪುಸ್ತಕದ ಮೇಲೆ ಬೇಕಾದರೆ ಕೇಸು ದಾಖಲಿಸಬಹುದು. ಪುಸ್ತಕವನ್ನು ಡಾ.ಶರತ್ ಅವರಿಂದಲೇ ಬಿಡುಗಡೆಗೊಳಿಸಲಾಗುವುದು ಎಂದೂ ಡಾ.ಪಿ.ವಿ.ಭಂಡಾರಿ ಸ್ಪಷ್ಟಪಡಿಸಿದರು.

ಇಂದಿನ ಪ್ರತಿಭಟನೆ ಮತ್ತು ಮೌನ ಮೆರವಣಿಗೆ ಹೋರಾಟದ ಮೊದಲ ಹಂತ, ಸತ್ಯಾಗ್ರಹ ಕ್ಲಿನಿಕ್ ಎರಡನೇ ಹಂತ, ಪುಸ್ತಕ ಬಿಡುಗಡೆ ಮೂರನೇ ಹಂತ. ನಾಲ್ಕನೇ ಹಂತವಾಗಿ ತಾನು ಈ
ಪ್ರಕರಣದಲ್ಲಿ ನ್ಯಾಯಕ್ಕಾಗಿ ನ್ಯಾಯಾಲಯದ ಮೊರೆ ಹೋಗುವುದಾಗಿ ಡಾ.ಭಂಡಾರಿ ಘೋಷಿಸಿದರು.

ಡಾ.ಶರತ್ ಕುಮಾರ್ ವಿದ್ಯಾರ್ಥಿ ದೆಸೆಯಿಂದಲೇ ತನ್ನ ಸಹಪಾಠಿ. ಆತ ಎಂತವನೆಂದು ತನಗೆ ಚೆನ್ನಾಗಿಯೇ ತಿಳಿದಿದೆ. ಅತ್ಯಂತ ಪ್ರಾಮಾಣಿಕ ವ್ಯಕ್ತಿಯಾದ ಡಾ.ಶರತ್ ಕುಮಾರ್ ರಾವ್, ಮಹಿಳೆಯ ಕೈನಿಂದ ಹಣ ಸಾಲ ಪಡೆದಿದ್ದಾನೆಂಬುದು ಅಪ್ಪಟ ಸುಲ್ಳು. ಡಾ.ಶರತ್ ಭ್ರಷ್ಟ ಅಲ್ಲ ಎಂಬುದನ್ನು ತಾನು ಯಾವಾಗ ಎಲ್ಲಿ ಬೇಕಾದರೂ ಹೇಳಬಲ್ಲೆ. ಇಂಥ ಪ್ರಾಮಾಣಿಕರಿಗೆ ಹೀಗೆ ಶಿಕ್ಷೆ ನೀಡುವುದು, ಭ್ರಷ್ಟರಿಗೆ ರಕ್ಷಣೆ ನೀಡಲಾಗುತ್ತಿದ್ದು, ಇದು ದುರಂತ ಎಂದು ಡಾ.ಪಿ.ವಿ.ಭಂಡಾರಿ ಖೇದ ವ್ಯಕ್ತಪಡಿಸಿದರು.

ಕಾನೂನಿನ ಬಗ್ಗೆ ಎಲ್ಲರೂ ಮಾತನಾಡುತ್ತಾರೆ. ಆದರೆ ಡಾ.ರತ್ ಅವರನ್ನು ಅಮಾನತು ಮಾಡುವ ಪ್ರಕ್ರಿಯೆಯಲ್ಲಿ, ಅಮಾನತು ಮಾಡಿದ ಬಳಿಕ ಪಾಲನೆ ಮಾಡಬೇಕಾದ ನಿಯಮಗಳಲ್ಲಿ ಸರಕಾರ ಯಾವುದನ್ನೂ ಪಾಲನೆ ಮಾಡುತಿಲ್ಲ, ಮಾಡಿಲ್ಲ. ಜೀವನಾಂಶವನ್ನೂ ಸರಿಯಾಗಿ ನೀಡುತ್ತಿಲ್ಲ. ಇಲಾಖಾ ವಿಚಾರಣೆಯನ್ನೂ ಆರಂಭಿಸುತ್ತಿಲ್ಲ. ಇಲಾಖಾ ವಿಚಾರಣೆಗೆ ನಿಯುಕ್ತಿಯಾದ ವಿಚಾರಣಾಧಿಕಾರಿ ಈ ಪ್ರಕರಣವನ್ನು ವಿಚಾರಣೆ ನಡೆಸಲು ತನ್ನಿಂದ ಸಾಧ್ಯವಿಲ್ಲ ಎಂದು ಪ್ರಕರಣದಿಂದ ಹಿಂದೆ ಸರಿದಿದ್ದಾರೆ. ಇದೆಲ್ಲ ಏನು, ಇದರ ಹಿಂದಿರುವ ಕಾಣದ ಕೈಗಳು ಯಾವುದು ಎಂದು ಡಾ.ಭಂಡಾರಿ ಖಾರವಾಗಿ ಪ್ರಶ್ನಿಸಿದರು.

ಡಾ.ಶರತ್ ಅಮಾನತು ಆದ ಲಾಗಾಯ್ತಿನಿಂದ ಜಿಲ್ಲಾಧಿಕಾರಿಗಳು, ಶಾಸಕರು, ಸಂಸದರು, ಜಿಲ್ಲಾ ಉಸ್ತುವಾರಿ ಸಚಿವರು, ಆರೋಗ್ಯ ಸಚಿವರು, ಆರೋಗ್ಯ ಇಲಾಖಾ ಪ್ರಧಾನ ಕಾರ್ಯದರ್ಶಿಗಳು, ಮುಖ್ಯಮಂತ್ರಿಗಳು ಸಹಿತ ಅನೇಕರಿಗೆ ಹಲವಾರು ಬಾರಿ ಪತ್ರ ಬರೆದಿದ್ದೇನೆ. ಆದರೆ ಯಾರೊಬ್ಬರದೂ ಕನಿಷ್ಟ ಸ್ಪಂದನೆಯೂ ಇಲ್ಲ. ಇದೀಗ ಅಂತಿಮವಾಗಿ ಬೀದಿಗಿಳಿದು ಹೋರಾಟ ಆರಂಭಿಸಿದ್ದೇನೆ ಎಂದು ಡಾ.ಪಿ.ವಿ.ಭಂಡಾರಿ ತಿಳಿಸಿದರು.

ತನ್ನ ಕರೆಗೆ ಓಗೊಟ್ಟು ತನ್ನ ನಿರೀಕ್ಷೆಗೂ ಮೀರಿ ಪ್ರತಿಭಟನೆಯಲ್ಲಿ ಭಾಗವಹಿಸಲು ಪ್ರಮುಖರನೇಕರು ಆಗಮಿಸಿರುವುದರಿಂದ ಹೋರಟ ಮುಂದುವರಿಸಲು ತನಗೆ ಸ್ಪೂತರ್ಿ ಸಿಕ್ಕಿದೆ. ಈ ಹೋರಾಟವನ್ನು ನ್ಯಾಯ ಸಿಗುವವರೆಗೆ, ಉಸಿರು ಇರುವ ವರೆಗೆ ಮೂಮದುವರಿಸುವುದಾಗಿಯೂ ಡಾ.ಭಂಡಾರಿ ಹೇಳಿದರು.

ಡಾ.ಶಾಲಿನಿ ಶರ್ಮ, ಡಾ.ದೀಪಕ್ ಮಲ್ಯ, ಡಾ.ವೀಣಾ, ಶ್ರೀಧರ ಕಿನ್ನಿಮೂಲ್ಕಿ, ವೇದಾವತಿ, ಚಿದಾನಂದ ಮಲ್ಯ, ಚಂದ್ರಶೇಖರ ಹೆಗ್ಡೆ, ಶಿವರಾಜ್, ಭಾಸ್ಕರ ರೈ, ಜೈ ಕೃಷ್ಣ ಬ್ರಹ್ಮಾವರ, ಬಾಲಕೃಷ್ಣ, ಸರಳಾ ಕಾಂಚನ್, ನಾಗೇಶ್, ರಾಜು ಪೂಜಾರಿ, ಜೀವನ್ ಲೂವಿಸ್, ನಾಗರಾಜ ಮೂರ್ತಿ, ಸುಚಿತ್ರಾ, ಪವಿತ್ರಾ, ಶ್ರೀಮತಿ ಪದ್ಮಾ, ಲೋಹಿತ್, ಪ್ರವೀಣ್, ಶ್ರೀಧರ ಗಾಣಿಗ, ಪ್ರಶಾಂತ್, ದಿನೇಶ್ ಪೂಜಾರಿ ಮೊದಲಾದ ನೂರಾರು ಮಂದಿ ಪ್ರತಿಭಟನಾ ಮೌನ ಮೆರವಣಿಗೆಯಲ್ಲಿ ಭಾಗವಹಿಸಿದ್ದರು.

ಉಡುಪಿ: ಉಡುಪಿ ಜಿಲ್ಲಾ ಸರಕಾರಿ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ಪ್ರಾಮಾಣಿಕ ವೈದ್ಯಾಧಿಕಾರಿ ಡಾ.ಶರತ್ ಕುಮಾರ್ ರಾವ್ ಅವರನ್ನು ಅನ್ಯಾಯವಾಗಿ ಅಮಾನತುಗೊಳಿಸಿ ಒಂದು ವರ್ಷ ಕಳೆದರೂ ಅಮಾನತು ಆದೇಶವನ್ನು ಹಿಂತೆಗೆದುಕೊಳ್ಳದೆ ಅಮಾನವೀಯತೆ ಪ್ರದರ್ಶಿಸುತ್ತಿರುವ ಸರಕಾರದ ಕ್ರಮವನ್ನು ಖಂಡಿಸಿ, ಅಮಾನತು ಆದೇಶವನ್ನು ಹಿಂತೆಗೆದುಕೊಳ್ಳುವಂತೆ ಒತ್ತಾಯಿಸಿ ಖ್ಯಾತ ಮನೋವೈದ್ಯರಾದ ಡಾ.ಪಿ.ವಿ.ಭಂಡಾರಿಯವರ ನೇತೃತ್ವದಲ್ಲಿ ನೂರಾರು ಮಂದಿ ಇಂದು ಉಡುಪಿ ಜಿಲ್ಲಾಸ್ಪತ್ರೆಯಿಂದ ಮಣಿಪಾಲದಲ್ಲಿರುವ ಜಿಲ್ಲಾಧಿಕಾರಿ ಕಚೇರಿ ವರೆಗೆ ಮೌನ ಪ್ರತಿಭಟನೆ ನಡೆಸಿದರು.

ಬೆಳಗ್ಗೆ ಅಜ್ಜರಕಾಡಿನಲ್ಲಿರುವ ಜಿಲ್ಲಾಸ್ಪತ್ರೆ ಮುಂಭಾಗದಲ್ಲಿ ಪ್ರತಿಭಟನಾಕಾರರನ್ನು ಉದ್ಧೇಶಿಸಿ ಮಾತನಾಡಿದ ಡಾ.ಭಂಡಾರಿ, ಮುಂದಿನ 15 ದಿನಗಳೊಳಗೆ ಡಾ.ಶರತ್ ಕುಮಾರ್ ರಾವ್ ಅವರ ಅಮಾನತು ಆದೇಶವನ್ನು ಹಿಂತೆಗೆದುಕೊಳ್ಳದೇ ಇದ್ದಲ್ಲಿ, ಜಿಲ್ಲಾಸ್ಪತ್ರೆ ಮುಂದೆ ಸತ್ಯಾಗ್ರಹ ಕ್ಲಿನಿಕ್ ಆರಂಭಿಸಿ, ಬಡವರಿಗೆ ಉಚಿತವಾಗಿ ಚಿಕಿತ್ಸೆ ಒದಗಿಸುವ ಮೂಲಕ ಹೋರಾಟವನ್ನು ಮುಂದುವರಿಸುವುದಾಗಿ ಘೋಷಿಸಿದರು.

ಸತ್ಯಾಗ್ರಹ ಕ್ಲಿನಿಕ್ ಆರಂಭಿಸಿದ ಬಳಿಕವೂ ಮುಂದಿನ 15 ದಿನಗಳೊಳಗೆ ಅಮಾನತು ಆದೇಶವನ್ನು ಹಿಂತೆಗೆದುಕೊ:ಳ್ಳದೇ ಇದ್ದಲ್ಲಿ ಇಡೀ ಹಗರಣದ ಹಿನ್ನೆಲೆ, ಇದರ ಹಿಂದಿರುವ ಕೈಗಳ ಸಹಿತ ಸಮಗ್ರ ಮಾಹಿತಿ ಇರುವ ಪುಸ್ತಕವನ್ನು ಬಿಡುಗಡೆಗೊಳಿಸುವುದಾಗಿಯೂ, ನಂತರ ಕಾನೂನು ಹೋರಾಟ ನಡೆಸುವುದಾಗಿ ಡಾ.ಭಂಡಾರಿ ಪ್ರಕಟಿಸಿದರು.

ಪ್ರತಿಭಟನಾ ಸಭೆಯ ಬಳಿಕ ಪ್ರತಿಭಟನಾಕಾರರು ಬಾಯಿಗೆ ಬಿಳಿ ಬಟ್ಟೆ ಮತ್ತು ತೋಳಿಗೆ ಕಪ್ಪು ಬಟ್ಟೆ ಕಟ್ಟಿಕೊಂಡು, ಘೋಷಣೆಗಳಿರುವ ಪ್ಲೆ ಕಾರ್ಡ್ ಹಿಡಿದುಕೊಂಡು ಎಂಡ್ ಪಾಯಿಂಟ್ ನಲ್ಲಿರುವ ಜಿಲ್ಲಾಧಿಕಾರಿ ಕಚೇರಿ ವರೆಗೆ ಮೌನ ಮೆರವಣಿಗೆ ನಡೆಸಿದರು.

ಐಎಂಎ ಅಧ್ಯಕ್ಷರಾದ ಡಾ.ಅಶೋಕ್ ಕುಮಾರ್ ಓಕುಡೆ, ಡಾ.ಅರವಿಂದ ನಾಯಕ್ ಅಮ್ಮುಂಜೆ, ಡಾ.ವಿರೂಪಾಕ್ಷ ದೇವರಮನಿ, ಡಾ.ಛಾಯಾಲತಾ, ಡಾ.ಗೌರಿ, ಡಾ.ಗಿರಿಜಾ, ಡಾ.ಶುಭ ಗೀತಾ, ಡಾ.ವಾಸುದೇವ, ಡಾ.ಸುನೀತಾ ಶೆಟ್ಟಿ, ಕೆ.ಎಂ.ಉಡುಪ, ಸಿ.ಎಸ್.ನಂಬಿಯಾರ್, ವೆರೋನಿಕಾ ಕರ್ನೇಲಿಯೋ, ಬೈಕಾಡಿ ಸುಪ್ರಸಾದ್ ಶೆಟ್ಟಿ, ಪ್ರಸನ್ನ ಶೆಟ್ಟಿ ಹೆಬ್ರಿ, ಪದ್ಮಾಸಿನಿ, ಉದಯ ಕುಮಾರ್ ಶೆಟ್ಟಿ ಇನ್ನಾ, ಚಂದ್ರಿಕಾ ಶೆಟ್ಟಿ, ನಾಗಭೂಷಣ ಶೇಟ್, ಸ್ವಪ್ನಾ ಶರತ್, ರಮೇಶ್ ಕಾಂಚನ್, ವಿಶು ಶೆಟ್ಟಿ ಅಂಬಲಪಾಡಿ, ದಿವಾಕರ ಕುಂದರ್, ವಾಸುದೇವ ಕಾಮತ್ ಕುಂದಾಪುರ, ರವಿರಾಜ್ ಎಚ್.ಪಿ., ಮಹೇಶ್ ಉಡುಪ, ರೋಹಿತ್ ಶೆಟ್ಟಿ ಬೈಲೂರು, ಚಂದ್ರಶೇಖರ ಶೆಟ್ಟಿ, ಸೌಜನ್ಯಾ ಶೆಟ್ಟಿ, ಕಿರಣ್, ರೊನಾಲ್ಡ್ ಕ್ಯಾಸ್ತಲಿನೋ, ಶ್ರೀರಾಮ ದಿವಾಣ ಸಹಿತ ಅನೇಕ ಮಂದಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.